Жылдын адамы Жапаров!
"Убакыт учкан куш" демекчи, көзүбүздү ачып жумганча бир жылыбыз жылт этип, тирүүлүктөгү өмүрүбүздү карытып, заматта өтүптүр. Биз гезитибиздин салтка айланган рубрикасы боюнча жылдын жыйынтыгын чыгарууга кириштик. Бул чыгарылышыбызда "Жылдын адамын" алып чыгып, узап бара жаткан жылдын этегинде, тагыраак айтсак, келерки саныбызда "Жылдын мыктыларын" тандайлы деп чечтик. Күбө болуп, көрүп турасыздар, быйылкы жылдын мыктысы, "Жылдын адамы" деп Садыр Нургожоевич Жапаровду таптык. Албетте, мындай чечимге келишибиздин түрдүү себептери, белгилүү жагдайлары болду. Эң негизгиси, "Кумтөр" маселеси боюнча экенин баса белгилегибиз келет. Себеби, эгемендүүлүк алгандан бери кыргыздын алтынын казып жаткан канадалык компанияны бир дагы комиссия Садыр Жапаровдой иликтеген эмес. Ондогон томдуктарды жазып, тасмаларга тартып, ишти ийне-жибине чейин иликтеп, миллиондогон долларларга азгырылбай, жалгыз Жапаров гана чыныгы иштин бетин ачып берди. Бул өтө чоң эмгек, тайманбас кайраттуулук, элим-жерим (!) деген бийик сезим экенин эч бирибиз тана албайбыз. Ооба, азыр бир кыргызга экинчи кыргыз жакпай турган мезгил. Бирибизди-бирибиз жек көрүп, регионалдык жактан бөлүнүп-жарылып, уруучулукка чейин иликтенип-жиликтенип жаткан кезибиз. Кыргызга ким жакшылык кылганын, ким жамандыгын жасап жатканын түшүнбөй, чалды-куйду заманды башыбыздан кечирип жаткан учурубуз. Келечегибиз бүдөмүк тартып, алдын көралбай жатабыз. Уурулар мамлекетти тоноп, "кыргыз" деп күйгөндөр зар какшаганын, кордук көргөнүн көрүп турсак да, көрмөксөн, билмексен болуп, табабыз канып турат. Бирок, түпкүлүктүү кыргызды Кудай колдоорун, жаратканым өзү жар болорун билебиз. "Ак ийилет, бирок сынбайт" дейт элибиз. Ким ак, ким кара экенин бир Кудай, анан турмуш өзү гана тастыктайт. Биз ошондуктан, бүгүн "Жылдын адамы" кылып тандаган Садыр Жапаровдун ишиндеги айрым урунттуу учурларына токтоло кетели.
Садыр Жапаров 2 жыл мурда "коррупциялашкан "Кыргызжилкомсоюзду" жоюп, баарын жергиликтүү бийликке берели" деген маселе көтөргөн эле. Муну парламент колдоого алып, "жоюлсун" деп добуш беришкен. Бирок, белгисиз себептер менен жоюлбай кала берди. Көрсө, "Кыргызжилкомсоюз" аркылуу миллиондогон сомдор чиновниктердин чөнтөктөрүнө кирип турат экен. Былтыр Садыр Жапаров Казакстандан ташылып жаткан көмүр абдан кымбат баада болуп жаткандыгын айтып, ал көмүр менен кыштан оңой чыкпасыбызды эске салып, парламентте кайра маселе
көтөргөн эле.

(Уландысы 10-бетте)

---

Байсаловдун иши байсалдуу болчудай...

Минсоцдун тегерегинде жалаң ызы-чуулар жаңырып, чет элдиктердин бала асыроосу, алардын миллиондогон акчасы жөнүндө гана угуп келгенбиз. Бирок, учурда аталган тармакта терең өзгөрүүлөр болуп жатканын кулагыбыз чалды. Муну калкыбыздын аялуу катмары сезип, кобурап келишүүдө. Айтымдарга караганда, Байсалов келери менен майыптарды кастарлаган уюмдарга мамиле өзгөрүп, алар мурункудай кайырчы таризинде министрликтин эшигин каккылабай, сый-урматка эгедер болуп, баардык маселелерге аралашып калышыптыр. Көрсө, эски укук коргоочу Эдил Байсалов азыр мамлекеттик иштин майын чыгарып, 20 жылдан бери мокоп калган чиновниктерди такалап, "мен элдин атынан келдим" деп, чекесин тердете иштетип атыптыр. Эмне дейбиз, биз да мурда Эдилди кичине сындап, туздап, чет тилди эле үйрөнүп алган эле бир пендеби (?) десек, мыктылыгын, мекенчилдигин, профессионалдуулугун көрсөтүп жатыптыр. Азаматсың (!) деп турубуз.

---

М.Карыбеков дагы эмне дейт?
Парапсихолог Мелис Карыбековдун маеги белгилүү себептер менен кийинки саныбызга жылып калды. Бул жагын окурмандарыбыз туура түшүнөт го (!) деп ойлойбуз. Эмесе, кийинки гезиттин чыгарылышында М.Карыбековдун кызыктуу ойлоруна күбө болосуздар.

Кубат Карачев

---