Жалал-Абадда ок атышуу болдубу?
Кечээ кечки саат 10дон өткөндө Жалал-Абад шаарында ок атышуу болуп, белгисиз куралчандардын тобу салгылашканы маалымдалды. Эки тарап 10 минутага чейин атышып турду дейт. Азырынча жаракат алгандар боюнча кабар ала албадык. Бул кайсы каршылашкан топтор экени белгисиз. Эгерде Түштүк жергесинде мындай ок атышууга чекит коюлбаса, анда оор кырдаал курчуп, мамлекеттүүлүккө шек кетпесе дейсиң.

Ж.Бакиев ок атууга буйрук бергенин айтты
Укук коргоочулар Азиза Абдрасулова жана Төлөйкан Исмаилова Жалал-Абадга барып, Курманбек Бакиев жана анын иниси Жаныш Бакиев менен сүйлөшүүлөрдү жүргүзүшкөн. К.Бакиев жеке керт башына жана үйбүлөсүнө коопсуздук сурап, буга чейин кайталап келген талаптарын дагы бир ирет кайталаптыр. Анан дагы азыркы убактылуу өкмөттүн мүчөлөрүнүн ичинен Роза Отунбаевага ишенерин айткан. Ал отставка боюнча арызды алуу үчүн убактылуу өкмөт мүчөлөрү Жалал-Абадга барыш керектигин, алардын коопсуздугуна жооп берерин билдирген. Ал эми иниси Жаныш Бакиев ок атууга команда бергенин мойнуна алган. Бирок команда бергендерден ал жалгыз эмес экенин кошумчалаган. Айтымында, Ж.Бакиев президенттин жеке коопсуздугуна жооптуу болгон. Ал эми Акүйдө Данияр Үсөнов менен катар бир канча башка министрлер, УКМК төрагасы дагы буйрук бергенин кыйыткан.

Кыргыз милисасы аянтка чыгат
Эртең эски аянтка милиция кызматкерлери жыйналып, тартип сакчылары экендигин тастыктаган күбөлүктөрүн таштоого ниеттенип жатышкандыгы туурасында маалыматты www.atamekenkg.com сайты жарыялады. Бул аракети менен кыргыз милисалары "Биз элди коргойбуз, ал эми бизди ким коргойт?" деген нааразылыгын билдиришмекчи. Кошумчаласак, милисалардын арасында да бул акцияга аралашкысы келбегендер да бар.