19.02.10 Президент Курманбек БАКИЕВ:
Тарифтерди көтөрүүнүн экинчи этабы болбой калышы мүмкүн
" Тарифтерди көтөрүүнүн экинчи этабынын болор-болбошу аудиттин жыйынтыктарына жараша болот. Негизи, жылуулукка жана ысык сууга болгон тарифтерди көтөрүүнүн экинчи этабы болбой калышы да мүмкүн", - деп билдирди КРнын Президенти Курманбек Бакиев кечээ Бишкек шаарынын Октябрь районунда жайгашкан №82 мектепке чейинки курактагы балдарга билим берүү мекемесинин ачылыш аземинен кийин журналисттердин суроолоруна жооп берип жатып.

Мамлекет башчысы салтанатта сүйлөгөн сөзүндө 1990-жылдары жүздөгөн балдар бакчалары жабылып, имараттарын ар кандай уюмдар ээлеп алышкандыгын эске салды. "Учурда баш калаабызда гана эмес, алыскы аймактарыбызда да бала бакчаларыбыз жетишсиз. Анткен менен, биз бул маселеге көз жуумп койбостон, колдон келген мүмкүнчүлүктөрдү колдонуп, аны чечүүгө аракеттерди көрүп келебиз. Дал ушул №82 бала бакчанын кайрадан ишке киргизилип жатышы - буга айкын мисал", - деди К.Бакиев.
"Жаңырган борбор шаар" программасынын алкагында 2012-жылга чейин Бишкекте дагы жети муниципалдык балдар бакчасы курулмакчы. Өткөн жылы билим берүү системасын реформалоо башталып, аны ишке ашыруу максатында улуттук долбоор ишке киргизилген. Анын алкагында мектепке чейинки билим берүү системасы үчүн жаңы окутуу программаларын түзүү боюнча бир катар иштерди аткаруу милдети турат.
"Ар бир баланын шык-жөндөмүн ачууда, мүмкүнчүлүктөрүн ишке ашырууда, алардын инсан катары калыптанышында сиздердин эмгегиңиздер зор. Сиздер биздин келечегибизди түптөп жатасыздар. Бул - жоопкерчилиги чоң жана ардактуу милдет. Бул бала бакчага бөбөктөр дайыма жадырап-жайнап, кубануу менен келип турушун каалайм", - деди мамлекет башчы.
Президент К.Бакиев бала бакчанын имараты менен толук таанышып, кыдырып көрүп, кичинекей бөбөктөрдүн күчү менен даярдалган чакан концертке күбө болуп, андан соң Курманбек Бакиев бала бакчанын жамааты жана тарбиялануучулары менен сүрөткө түштү.
Иш-чаранын аягында Президент жалпы
коомчулуктун кызыгуусун жаратып жаткан электрэнергиясына болгон тарифтердин кымбатташы тууралуу журналисттердин суроолоруна жооп берди. Анда, өлкө же мурунку тарифтерди калтырып, коллапска кабылууну, же элге жагымсыз чараларды көрүүгө барууну тандоосу керек болгондугун айтты.
Мамлекет башчысы зор гидроэнергетикалык потенциалы болуп туруп Кыргызстан мурунку бийликтин жоопкерчиликсиздигинен улам электрэнергиясынын таңсыктыгына кабылгандыгына көңүл бурду. 90-жылдардын башынан тартып жаңы кубаттуулуктар ишке киргизилген эмес, антсе да бардык объекттер электрэнергиясын колдонууга өткөн.
Бул болсо жабдуулардын 70%нын эскиришине алып келген. Көмүр пайдаланылбай калган, анткени электрэнергиясынын баасы абдан арзан болгон. Салыштыра келсек, Россияда былтыр бир киловатт электр энергиясы
2 сомдон ашык, Азербайжанда 3 сомдон ашык, ал эми Кыргызстанда 70 тыйын болуп келген.
Президент электр энергия түйүндөрүнө байланышкан абалга да токтолду. "Жайында республиканын түндүгү электрэнергиясын "Токтогульская ГЭС Фрунзенская" электрлиниясы аркылуу алат. Кышында бул жетишсиз, ошон үчүн Борбордук Азия өлкөлөрүнүн системасы аркылуу энергия алууга туура келет. Өзбекстандын бирдиктүү түйүндөн чыгып кетүүсү энергия алууда проблемаларды жаратты. Биз тыштан жардам суроого мажбур болдук. Анын ичинде Кытай менен "Датка-Кемин" электрөткөрүүчү линиясын куруу туурасында сүйлөшүүлөрдү жүргүздүк. Ошондо өзүбүздүн линиялар аркылуу түндүгүбүздөн түштүгүбүзгө электрэнергиясын бере алабыз", - деди К.Бакиев.
Мамлекет башчысы: "Тарифтерди көтөрбөй, оппозициядан сын укпай койсо деле болмок. Бирок, бул балдарыбыздын, неберелерибиздин, жалпы өлкөбүздүн келечеги үчүн кылган кыянатчылык болуп калмак. Бир нече жылдан кийин техногенник кыйроого учурарыбыз айкын болчу. Менимче, тарифтерди көтөрүү жоопкерчиликтүү, туура чечим болгон", - деп баса белгиледи.
Президент тарифтердин көтөрүлүшүнө байланыштуу мамлекет тарабынан көрүлүп жаткан социалдык колдоо чараларына токтолду. Алар миллионго жакын адамды камтый тургандыгы белгиленди. Бул максатка республикалык бюджеттен кошумча түрдө 3,4 млрд. сом бөлүнмөкчү. Андан тышкары, республикалык бюджетте 1,2 миллиард сомдон ашык каражат пенсияларды төлөп берүү үчүн каралган. Социалдык жөлөкпулдардын, пенсиялардын көлөмү сезилерлик көбөйтүлөт.
Ал эми жылуулукка болгон тарифтерге байланышкан маселеге кайрылып, мамлекет башчысы Өнүктүрүү, инвестициялар жана инновациялар борбордук агенттигине Өкмөт менен бирдикте аталган тарифтерди аудиттен өткөрүүгө тапшырма берилгендигин маалымдады. "Аудитти көз карандысыз эл аралык компания өткөрүүдө. Эгер энергетиктерибиз жылуулукка болгон тарифтерди туура эмес эсептешкен болсо, күнөөлүүлөргө катуу чаралар көрүлөт. Андан тышкары, дал ушул аудиттин ишинин жыйынтыгына жараша тарифтерди көтөрүүнүн экинчи этабы болоор-болбосу чечилет. Жылуулукка жана ысык суу менен камсыздоого тарифтерди көтөрүүнүн экинчи этабы болбошу да мүмкүн деп ойлойм", - деп баса белгиледи К.Бакиев.
№82 бала бакчасын ачуу аземинен соң Президент Курманбек Бакиевдин кортежи шаардын 5- жана 6-микрорайондорунун ортосунда жайгашкан ээн жерге келип токтоду. Мэрдин айтымында, 650 метрге созулган бул аймак бош калган, шаарга эч кандай пайда алып келбейт. Ошондуктан, мэрия "Набережная ЮБЧК" долбоорун ишке ашырып, анын алкагында бул жерге шаардыктардын эс алуучу жайын курууну пландаштырып жаткандыгы белгиленди. Мамлекет башчысы мэрге бул долбоорду 31-августка - Кыргызстандын эгемендүүлүгүнүн күнүнө карата аяктоону тапшырды.
Анара АРЗЫБАЙ кызы,
"Кыргыз Туусу"
Султан ДОСАЛИЕВ (фото)