Кыргыз гезиттери


PRESSKG.COM

ӨМҮРҮ ӨРНӨК АСЫЛ ИНСАНДЫН АЙКЕЛИ ТУРГУЗУЛДУ
АРУУЛУККА УМТУЛГАН ТАЗА ИНСАН - исхак раззаков
1945-жылы 4-ноябрда КПСС БКнын саясий бюросунун чечими менен Совет өкмөтү И. Раззаковду Кыргызстандын Министрлер Советинин төрагалык кызматына жөнөткөн. Ал ошол мезгилде 35 гана жашта болгону менен мамлекеттик масштабдагы табылгыс ишмер, эл чарбасын өнүктүрүүдөгү чоң тажрыйбага ээ жетекчи, чыныгы элдик уул эле.

Согуштан кийинки эл чарбасынын абалы оор эле. И. Раззаков болгон күчүн, билимин, талантын республикабыздын экономикалык жактан өнүгүп- өсүшүнө жумшаган. Кыргыз ССРнин Министрлер Советинин иши И. Раззаковдун жөндөмдүүлүгүнүн жана иштин көзүн билген уюштуруучулугунун аркасында илгерилеп, республикада теңдешсиз лидер экендиги айкындалган. Исхак Раззаковдун мамлекетибиз үчүн жасаган зор иштери гана эмес, анын адамдык сапаттары да бүгүнкү күнгө чейин элдин эсинде сакталып, айтылып келет. Ал жөнүндө Кыргыз Эл баатыры, академик Түгөлбай Сыдыкбеков: "Нукура жөнөкөй мүнөзү, кайталангыс таланты, адамгерчилик сапаты, эмгекчилдиги, интернационалисттик көз карашы бир- бирине айкалышкан, бардык ишке чыгармачылык мамилесинен тайбаган, курч жан эле"- деп эскерет. Улуу Ата Мекендик согуштан кийин бүлгүнгө учураган эл чарбасы бутуна туруп, эң ири машине куруу тармагы өсүп чыккан. М.Ф. Фрунзе атындагы айыл чарба машиналарын куруучу ири завод, текстиль, трикотаж, бут кийим фабрикалары ишке киргизилген. Ошондо Раззаковдун жетекчиликтеги ишмердүүлүгү жогору бааланып, 1950- жылы Кыргызстан компартиясынын борбордук комитетинин 1- катчылыгына көтөрүлүп, 1961- жылга чейин республиканын партиялык уюмун жетектеп турган. Бул мезгилдерде да эл үчүн кам көргөн жетекчинин тыным албай иштеши иштин илгерилешине өбөлгө түзгөн. 1953- жылы Союздагы эң оор тоолуу аймактагы Фрунзе- Ош автожолу курула баштаган. "Элден эр туулат, эр элди багат" деген накыл сөздүн мааниси Раззаковдун жетекчилик ишмердүүлүгү менен гана айкалышып тургансыйт.
И. Раззаковдун өзүнүн эскерүүсүндө мындай деп жазганы бар: "Эмне кылдым, эмнеге жетише алдым, мамлекеттеги жетекчилик кызматымда кимдер үчүн аракеттендим? Эл акыйкат, эл баалайт". Мындан сырткары анын: "Мен таза болсом, сен таза болсоң, коом таза болот!"- деген накыл сөзү бүгүнкү күнгө төп келип, ар бирибизди Ата- Мекенибиз үчүн үчүн акыйкат иштөөгө үндөп тургансыйт.
Өмүрүнүн акыркы 18 жылын Москвадан өткөргөн залкар мекендешибиз Кыргызстанга болгону бир гана жолу аз убакытка келип, керемет кыргыз жергесинин абасынан кенен жутуп, сагыныч таратып, бирок, жүрөгүндөгү кусалыгынан арыла албай кеткен.

(Уландысы 6-бетте)




ЭЛ АРАЛЫК ЖАҢЫЛЫКТАР
Лукашенко алтын сакталган жерлерин көрсөтөт
Беларусь Республикасынын Президенти Александр Лукашенко беларусь рублинин баасы төмөндөй тургандыгы тууралуу имиштерди четке какты. "Интерфакс" билдиргендей, өлкөдө абалды турукташтыруучу жетиштүү валюталык резерв топтогон. Өзгөчө Улуттук банк алтындын запастарын көбөйтө алды. "Биз жертөлөлөрдү ачып, чогулткан алтындарды көрсөтөбүз", - дейт Лукашенко.
Президенттин айтымында, өлкө өкмөтү эч кандай девальвацияны пландаштырган жок. Беларусь рублинин "өйдө-ылдыйы" жакын арада айтылат. А.Лукашенко кошумчалагандай, акча наркынын төмөндөөсү тууралуу чуулганды "президенттикке жан талашкан көз боеомочулар көтөргөн, өлкөдө канчалык жаман абал орун алса, алар үчүн ошончолук пайдалуу".

"Свет аке" эл аралык фестивалда
Минск шаарында 5-ноябрдан 12-ноябрга чейин өткөрүлгөн "Листопад-2010" аттуу XVII эл аралык кинофестивалынан режиссер Актан Арым Кубаттын "Свет-аке" кинотасмасы 2 байгеге ээ болду. Бул атайын байгелер фильмдин ээси А.Кубатка КМШнын "Чексиз кино" аткаруучу комитети жана калыстар тобунун тарабынан ыйгарылды.

19 жылга камалган Тайвань президенти
Тайвандын Жогорку соту өлкөнүн мурдагы президенти Чень Шуйбяня жана анын аялы У Шучжэнди пара алгандыктары үчүн айыптап 19 жылга түрмөгө кести. Бул тууралуу Reuters булагы соттун өкүлүнө таянып маалымдады. Мурдагы президент жер участогуна курулуш курууда жана кээ бир чиновниктерди кызматка коюуда пара алган деп айыпталууда.

Инвесторлордун ири долбоорлору
Кытай инвесторлору 2011-жылдын жазында 2008-жылы токтотулган Москвадагы "Парк Хуамин" ишкер борборунун курулуш долбоорун кайрадан баштайт. Ири комплекс "Ботаникалык бак" метросунан алыс эмес жерде курулат. Долбоорго жумшалган инвестиция көлөмү 760 млн долларга бааланат.


Кытай вазасы - 83 млн доллар
Цин династиясындагы Цяньлун императорунун учурундагы фарфор ваза Лондондо өткөрүлгөн аукциондо 51,6 млн фунт стерлингге (83 млн доллар) бааланган. Бул ушул кезге дейре кытай буюмуна коюлган эң жогорку чектеги сумма катары эсептелет.

WWW. булактарынан даярдалды





кыргыз тилиндеги гезит "CCCP"




Яндекс.Метрика