Кыргыз гезиттери


п»ї
  Ким? Ким дейсиң?!

Кыргызстанды Борончу же Жамбыл башкарып калышы мүмкүнбү?..

Боорду эзген Борончу менен "Ленин мага окшош" деген Жамбыл агаларыбыз президенттикке талапкерлигин койгондон бери, эл топтошкон жерлерде күбүр-шыбыр сөздөр көп жүрчү болду.

Маселен, шаарыбыздын чоң-чоң мончолоруна түшүп ырахат алган аксакал, көксакалдар "Тамаша үчүн деле мен добушумду Борончуга берем", же болбосо "Баары бир Атамбаев же Ташиев президент болот, мен ушул Жамбыл үчүн бир жолку добушумду бергим келип турат" деген өңдүү кептерди жүгүртүшүүдө. Андан улам президенттик тактыны талапкерлер тамашага чалып жаткандан кийин, шайлоочулар тамашага салганга неге болбосун? Жакшылап баам салсак бир жолку добушун бул эки куудулдан аябай тургандардын саны өтө эле көп экен. Тамаша чынга айланып, бир жолку добуштар топтолуп отуруп, президенттик тактыга Борончу же Жамбылды алып келип алсак, мамлекетибиздин эртеңи кандай болор экен, ыя? Анын үстүнө Жамбыл аке өзү да өзүнүн күчүнө бекем ишенип, 2-турга Атамбаев, Ташиев жана мен болуп чогуу чыгабыз деген оюн жашырбай айтып жүрөт. "А Борончу агачы?" деп сурасак, "Ал өтпөйт" деп ишенимдүү жооп берген Жамбыл акенин дымагына баракелде!





  Референдум...

Конституция жакпаса колуңду кой

Конституцияны жамап-жаскоо, же кайрадан "токуп" чыгуу боюнча Кыргызстан алдына башка мамлекеттерди чыгарбай калганы жашыруун деле эмес. Бизге өзү кандай Конституция жагаарын деле жакшы билбей, улам "Бөйрөктөн шыйрак чыгарып" келгенибиз менен жашообуз оңолмок турсун жоголуп баратат.

Азыраак адамга жакпай калса эле, Конституцияны "башка чаап", бөлөк нукка салып ийгибиз келет. Мына ушундай кезектеги кадамды эми Ш. Медетбеков башында турган демилгечи топ баштаганы туру. 19-августь күнү БШКнын каттоосунан өткөн бул демилгечи топ азыркы күндө БШКдан кол коючу кагаздарды күтүп аткандагы кербези. Ал кагаздар колго тийген күндөн тарта 3 айга чейин 300 миң шайлоочунун колун чогултуулары керек. Ал чогулган колдор жасалмасыз экендиги тастыкталып, андан соң парламентке өткөрүлүп, ал жактан тиешелүү чечим кабыл алынышы шарт. Кол чогултуу иштери өз каалоосу менен жардамдашчулардын жана демилгечи топтун мүчөлөрүнүн карандай мээнети менен жүзөгө ашырылат. Бүгүнкү күндө бул демилгечи топтун 62 мүчөсү бар. Ар бир район, айылдарга атайын штабдар ачылат. Ш.Медетбеков башында турган демилгечи топтун негизги максаты, азыркы Конституцияны жокко чыгарып, президенттик башкаруу системасын кайтарып келүү болуп эсептелет. Биздин өлкөдөгү демилгечи топ болобу, атка минериби, оппозициясыбы, айтор бардыгы кетирилип жаткан мүчүлүштүктөрдүн барын Конституциядан эле көрө берүүнү адатка айландырып алышты. Адегенде ыйманын саткан, өлөрчө жеп алып, "Кудай урсун" деп карганып, Кудайды өзүнө дос кылып алган, бир нече жүздүү пенделерден саясый айдыңды тазалашыбыз керек. Андан соң, кандай Конституция болсо, мамлекетибиз оңолуу жолуна түшөт.




  Шайлоого шайма-шай

Каттоодо турбасаң да шайлайсың...

Кыргызстанда алдыда болуучу президенттик таймашка карата участкалык шайлоо комиссияларын түзүү иштери аяктады. Жалпысынан 2289 участкалык шайлоо комиссиялары түзүлүп, ишке киришти.

Атай кетсек, Баткен облусу боюнча - 198, Бишкек шаары боюнча - 204, Ысык-Көл облусу боюнча - 241, Ош облусу боюнча - 479, Ош шаары боюнча - 73, Жалал-Абад облусу боюнча - 417, Нарын облусу боюнча - 165, Талас облусу боюнча - 116, Чүй облусу боюнча - 396. Ал эми Кыргызстандын аймагынан тышкары 23 өлкөдө жалпысынан 29 участкалык шайлоо комиссиялары түзүлгөн. Демек, шайлоого даярдык шайма-шай. Болгону бул жолку шайлоодо ар бир шайлоочу катталган жеринде гана шайлоого укуктуубу, же буга чейин болуп келгендей кошумча тизме менен каалаган жеринен шайлай береби, маалымат жок. Эгерде бул жолу да шайлоодо "прописканын" кереги тийбесе, анда аны паспорттон таптакыр эле алып салуу зарылчылыгы тургандай. Неге дегенде, мектепке балаңды окутууда, дарыгерге кайсы жерде жүрсөң, ошол жерден көрүнүүгө жолтоо болгон "прописканын", талапкерлерди президенттик такты менен депутаттык креслого отургузууда жолтоо болбогонун айта бер. Андай "прописканын" эмне кереги бар?..

Д. Байаман




  Өзүмбилемдик

Мэр Өмүркуловдун бажасына боло береби?

Өткөн жылдагы апрель окуясында шаардык саламаттыкты сактоо департаментинин мурдагы башчысы Гүлжигит Аалиевдин жетекчилиги менен иштеген шаардык дарыгерлердин эмгегине ыраазычылык билдирүүнүн ордуна, Иса Өмүркулов Алиевден өз эрки менен кызматтан кетүүнү талап кылган. Гүлжигит мырза мэрдин сунушунан баш тарткан. А саламаттыкты сактоо министрлиги Аалиевди колдогон, бирок шаардагы дарылоочу мекемелердин жергиликтүү бюджеттен каржылангандыгынан улам маселеге таасир эте алган эмес. Мындан башка маселе боюнча министрликтин коллегиясы Иса мырзага шаар башчысы катарында кайрылып, энелердин өлүмүнүн көбөйүшүнө жол бергендиги үчүн перинаталдык борбордун башкы дарыгерин кызматтан алуу туурасында сунуш берген. Бирок, мэр мындай билдирүүгө маани берүүнүн жана чара көрүүнүн ордуна түкүрүп, ден соолук үчүн күрөшкөн кызматкерлерди ойду-келди ыргытуу менен, шаардыктардын саламаттыгына кайдыгерлик кылууда.


Мурзалиев - ким өзү?
Амангелди мырза дал ошол Бишкек мэрине анын аялы жагынан тууган. Тактап айтканда шаар башчысына бажа. Туугандык мамиледен чыгып, Чүй облустук ооруканасынын болгону белгисиз урологу болуп келген. 7-апрелдеги окуялардын шамалынан пайдаланып, бир топ адамдардын тобу Чүй облустук ооруканасына келишип, оорукананын башчысынан кызмат орунду Мурзалиевге бошотуп берүүнү талап кылышат. Милиция аралашып, жоопко келгенде директор боло албай калган Амангелди мырза басып алуучуларга тиешем жок деп кызарган. Оорукананын кызматкерлери ошол сааттарда октон жаракат алгандарга тез жардам көрсөтүү менен бут жерге тийбей чуркап жүрүшсө, Мурзалиевдин өз көмөчүнө күл тартуу менен алектенгендигин кантип түшүнсө болот? Анан Мурзалиев асмандан түшкөндөй болуп, Бишкектин саламаттыкты сактоо департаментинин директорунун креслосуна отуруп калды. Эмне эле Өмүркулов Гүлжигит Аалиевди кызматтан алууга жанталашкан десек, анын ордун бажасына бошотуп берүүнү пландаган экен. Алиев аргасыздыктан өз каалоосу менен жумуштан кетүү боюнча арызын жазып берген күнү мэр Мурзалиевди бул кызматка бекиткен. Амангелди мырза бул кызматта эми кандай иштейт, убакыт көрсөтөт. Бирок, ал иштеген үч айдан бери аталган департаментти ызы-чуу менен териштирүүлөр курчап калды. Келгени кандай болсо, кетээри да ошондой болчу эле. А чүйлүк дарыгерлердин азыр Мурзалиевден кутулгандарына сүйүнүп жатышканын билдик.

Дарыгер Садабаева жаш келинди энелик бакыттан ажыратты
Редакцияга Ноокат районун тургуну Салия Кайназарова (аты-жөнү өзгөртүлүп берилди) кайрылып, Бишкек шаарындагы №7 үй-бүлөлүк дарыгерлер борборундагы "узи" аппаратында иштеген дарыгер Гүлнара Садабаевадан текшерүүдөн өткөндүгүн билдирет. Айтымында, Кайназарова өзүнүн кош бойлуу экендигин билген эмес. Садабаева да дарыгер катары аппараттан текшерип, анын кош бойлуу экендигин байкабаган. Эч кандай анализдерди тапшырттырбай туруп, бир топ дары-дармектерди жазып берет. Алардын арасында "Цеф-3" деп аталган күчтүү антибиотик да болгон экен. Жаңы турмуш курган келин дарыгердин айкандарын аткарып, дарылардын баарын ичкен соң ичи ооруп, бейтапка айланат. Жергиликтүү дарыгерлер Кайназарованын кош бойлуу экендигин айтышат. Ич оорунун азабынан кайра Бишкекке келип, Садабаевага жолукса, ал тааныш гинекологго алып барат. Гнеколог кош бойлуу кезде күчтүү антибиотиктерди ичүүгө болбосун айтып, түйүлдүктүн туура эмес өрчүп калаарын эскертет. Ошентип эки дарыгер Кайназаровага аборт жасашат. Келин кайра айылга кетип, ич оорусу басылбайт. Дагы эле жергиликтүү дарыгерлер текшеришип, анын 7-8 жумалык боюнда бар экендигин айтышат. Кийин белгилүү болгондой, Садабаева тааныш гинекологу менен ага толук аборт жасашпай, ишти чала кылышкан. Кайназарова борборду көздөй жөнөп, жаш келин операцияга кирүүгө аргасыз болот. Дал ошол күнү Кайназарова Садабаеванын кесепетинен энелик бакыттан ажырайт. Бул арманы менен жабырлануучу Садабаеванын жазасын берүү үчүн тийиштүү кызматтардын баарына: Мэр Өмүркуловго, Бишкек шаарынын прокуроруна, Башкы прокурор Саляновага кайрылган, тилекке каршы биринен да жооп берилген эмес. Жабырлануучунун айтымында, дарыгер Г.Садабаева тааныштык менен, бардык жерде ишти жаап келет.
Бул окуядан соң, кызматтык шалаакылыгы үчүн №7-үй-бүлөлүк дарыгер борборунун башчысы Аида Рысбаева Садабаеваны жумуштан кетирүү талабын коёт. А Садабаева болсо жайына койбосо Рысбаеваны кызматтан шыпырып түшүрүүгө күчү жетээрин айтып, коркутат. Садабаева айкандай эле, Бишкек шаардык саламаттыкты сактоо департаментинин башчысы, мэрдин бажасы Амангелди Мурзалиевдин колдоосу менен Рысбаеваны жумуштан бошоттурат. Айдан издегени жерден табылып, Мурзалиев үчүн Рысбаеванын орду керек болуп турган экен. Бул Амангелди мырзанын тегерегиндеги коррупциялык иштердин дагы бири. Кийинкиси төмөндө.

Бирөөнүн кайгысынын ордуна той кылып...
Борбор шаардагы №8 үй-бүлөлүк медицина борборунун мурдагы башчысы Елена Чернышеванын айтымында, ага кызматынан баш тартуу боюнча Бишкектин саламаттыкты сактоо департаментинин башчысы Амангелди Мурзалиев тарабынан үч жолу сунуш жасалыптыр. "Кызматтан кетпесең былыктарыңды чукуп кетүүгө аргасыз кылам",- деген экен. Айтканына туруп, акыры Чернышеваны Мурзалиев чаап түштү. Жумушсуз калган дарыгер өзүнүн айыпсыздыгын далилдөө аракети менен тийиштүү каалгалардын баарын такылдатып жүрөт, бирок азырынча майнап жок. Елена айымдын билдирүүсүндө, Мурзалиев каржы полициясындагы орун басарлыкта иштеген досуна таянып, №8 - үй-бүлөлүк медицина борборун тинтүүгө алдырат. Башчынын кысымынан кийин Чернышеваны колдоп келген өз жамаатынын 85 пайызы ат теппей, жылан чакпай кайрадан Елена айымга каршы чыгышкан. Ошентип Мурзалиевдин тараткан вирусунан кийин буга чейин шаарда мыкты уюштургуч дарыгер катары белгилүү Чернышева айыпкерге айланып отурат.

Жыйынтык сөз
Мынакей тууган, апрелден кийин өзүнө патриотмун деп ишенип алган Иса Өмүркуловдун патриоттук иштеринин кандай экенин баамдадыңыз. Иса мырза бажасына кызмат белек кылып, өз кайын журтуна жакшылык кылган болсо, бир иши менен миңдеген адамдардын саламаттыгына балта чаап жатат. Мыкты адистердин ордун талашып, дарыгерлердин жамааттарына бүлүк салды. Буга чейин туугандык саясат саламаттыкты сактоо тармагына ди кирип кетпесе экен деп чоочулап келишкен болсо, ошол чоочулоону Өмүркулов жокко чыгарып, "туугандык, жакындык вирусту" таратып берди. "Иса" вирусу менен Амангелди Мурзалиевдин борбор калаанын саламаттыкты сактоо департаментинин башчылыгына келишин буга далил деп түшүнсө болот.

Намыс Баатыров




кыргыз тилиндеги гезит "Майдан.kg"









??.??