Кыргыз гезиттери




Абакта
сулуулар конкурсу
Жылына бир келчү 8-март- Аялдардын эл аралык майрамын ар бир аялзаты өзгөчө толкундануу менен кабыл алат эмеспи. Анткени, ушул күнү ал айланадагы адамдардан, жакындарынан, жандай көргөн жарымынан жакшы сөз угуп, жагымдуу маанай алат. Так ушундай жылуулукту башкалардан айырмаланып зарыга күткөн айымдар- абактагылар. Алар үчүн ал-акыбал сурап, абак ичине адам барган күн да майрам. Кайсы майрам болбосун, абактагы айымдарыбызды унутпай, алардын жүрөгүнө жылуулук,эртеңки келечегине үмүт, ишеним тартуулап келген бир айым бар. 11 жылдан бери түрмөлөрдү түрө кыдырып, маданий азык тартуулап, ар кандай концерт, кече, конкурстарды өткөрүп келе жаткан продюсер Назгүл Насиеванын бул эмгегин башкалар "ии" деп коюшар, бирок билгендер "бали!" дешет. Назгүл айым бул жылы да майрам алды 4-мартта ырчы мырзалар менен, белек-бечкегин камдап алып Степной айылындагы №2 түрмөнүн босогосун аттады. Бул күнү абак ичинде "Мисс-2011" -сулуулук конкурсу өтүп, 4 отряддан бирден сулуу тандалып, ар бир отряд өз сулуусун колдоп-коштоп, аял -абакта да аял экен, сулуулукту даңазалашты. Көз көрүп күлүңдөгөн, кулак угуп кубанган бул конкурс 3 турдан турду. Алгач өздөрүн айга, күнгө, гүлгө теңеген айымдардын өздөрүн тааныштыруусу болсо, экинчи этабында сахналаштырылган оюн көрсөтүшүп, үчүнчүсүндө, ар бири өз өнөрлөрүн көрөрмандарга тартуулашты. Башка шартта өтүп келаткан сулуулук конкурстардан бирден-бир өзгөчөлүгү-айымдардын ар бир кийген, кооздугу көз жоосун алган кийимдери атайын дүкөндөрдөн сатылып алынган эмес, көздүн майы кеткен кол эмгектери болду. Ушундан эле, айымдарыбыз убактыларын текке кетирбей, пайдалуу иш жасап жүрүшкөнүн баамдасак болот. Дагы бир жагымдуу жагдай- айымдарды куттуктап "Ишкер айымдар клубунун" айымдары да келишкен. Басымдуу бөлүгү чет элдик бул айымдар да куру кол келишпептир. Өзгөчө ал жердегилер Диля деген айымдын келишине кубангандарын сездим. Анын себеби бар экен. Анткени, Диля айым бир кезде алар ичкенди ичип, кийгенди кийип, кейигенде кейип, ыйлаганда ыйлап, муздак дубалдарды тиктеп, далай уйкусуз түндөрдү бирге өткөрүшкөн . Абактан бошогон айым кечээги тагдырлаштарын унутпай, жолдошу экөө келиптир. ЖАМКнын штаб жетекчиси Тургунбек Токтосунов мырза Диля айымды мисал кылып, "Эртеңки эркиндикке чыккан күнү силер да Дилядай болуп жакшы жар күтүп, ишиңер ийгиликтүү болуп, турмушуңардан өз ордуңарды табаарыңарга эч качан күмөн санабагыла. Силерди күткөн адамдар бар..." деп тилектерине тирек, үмүттөрүнө шоола чачты. Абак жетекчи болуп келгенине эки гана күн болгон Акылбек Ибраев мырза айымдарга "амнистия" тиледи эле, зал жаңыра түштү. Ал эми концерттик программаны куйкум сөздүү Эркин менен Чолпонай алып барып, Максат Бегалиев, Азат Болотбек, Омар, Мелис Абдрашитов мырзалар ыр десте тартуулашкандан тышкары, калыстар тобунда орун алышты. Ошондой эле калыстар тобунун катарын Тургунбек Токтосунов, ЖАМКнын пресс-катчысы Эркин Көңүлкулов, НБТ каналынын режиссеру Мирлан Муратов, администратор айым Астра, чет элдик айым Мария болду. Ал эми Назгүл айымдын "Я люблю тебя до слёз" деген популярдуу ырды аткаруусу, отургандардын көөдөнүн сыгып, көздөрүн жашка толтурду. Ошентип, жыйынтыгында "Мисс-2011" болуп Феруза Жумабаева аттуу айым алдыга озуп чыкты. Гүлчехра Каримова 2- орунду, Рахат Арыкбаева 3- орунду, Динара Барпиева 4-орунду алып, ар бир айымдын колуна белектер жык толду. Буюрса, айымдар Назгүл айым уюштуруп, алып барган нан бышыргычтан ысык нан жешет. Чет элдик айымдар менен Диля айым алып келген корзина толгон косметика каражаттарына ажарын огобетер арттырып, сулууланышат.
Эльмира МАДИЕВА




кыргыз тилиндеги гезит "Лозунг"




Яндекс.Метрика