Кыргыз гезиттери



Кыргызстан Россияны таң калтырды
Россиянын Руза шаарында өспүрүмдөр ортосунда болуп өткөн сууда сүзүү боюнча мелдеште калыстар 12 алтын медалды Кыргызстандын эсебине ыйгарды. Өлкөбүздөн 11 спортчу катышкан экен, алтындарды араң көтөрүп келатышат. Аттарын атасак, Никита Пауков 4, Владислав Шулико менен Азиз Сансызбаев 3төн алтын, 1 күмүш төш белгиге ээ болушту. Жалпы жонунан эсептегенде, кыргызстандык суучул балдар 21 байгени камсыздашкан. Баракелде, баралына келгенде балык болуп кетишпес бекен!!!

Майрамга карата көркөм гимнастика "сүйлөйт"
12-13 -мартта көркөм гимнастика боюнча айымдардын майрамына карата эларалык турнир өткөнү туру. Буга 1998-жылдан берки бойго жете элек бийкеч спортчулар гана катыша алат. Мелдеш борбор калаадагы "Дастан" спорт мектебинде өтүп, кызыктыруучу белектер берилмекчи болду. Албетте, буга чейин спорттун бул тармагы каралбай калып, далай ийиктей имерилген кыздарыбыздын чет жакаларга кеткендигин эске алсак, бул жакшы саамалык. Быйылкы 8-март, спортчу айымдарга өзгөчө күн катары бир топко эстеринен чыкпай турган болуп калды...

Темир тулпарлар туйлайт
13-мартта Аламүдүн районунун Новопокровка айылында Жазгы -"Жип" автожарыш фестивалы өтөт. Буга каалагандардын баары катыша алат. Мелдеш TR1, TR2, TR3 категориясындагы айланма жолдо болуп, биринчилик үчүн темир тулпардын айдоочулары жан-алакетке түшөт экен. Бул кар-баткагы чачыраган мелдештин күбөсү болуу үчүн ал күнү таңкы саат тогузда аталган жерге баруу керек. Бул убакта картанын схемасы менен таанышуу жана катышууга официалдуу арыз жазуу иштери 10го чейин уланат. Андан кийин атайын коммисия темир тулпарларды техникалык кароодон өткөрүп, "суутуп" дегендей өз камылгаларын көрүшөт. Ошентип, 11:30да салтанаттуу ачылыш болуп, 12:00дө жарыш старт алмакчы. Кыргыздын ат чабышындай болгон унаа жарышында канча автоунаа өз тетиктеринен айрылар экен? Жолтандабас жорголордун канчоосу аласалып, канчоосу кырданып "эс алып" калаары дагы ошондо билинет эмеспи...

Тогуз-Булак. Сноуборд. Чемпионат
Бүгүн Бишкек шаарынан өтө алыс эмес Тогуз-Булак кышкы оюндар базасында сноуборд боюнча Кыргызстандын чемпионаттыгы өтөт. Укканыбызча спорттун бул түрү боюнча чемпионат биринчи жолу. Буга бутуна жылгаяк темирди тагып, ойкуп-кайкый ала тургандын баары каалагандай катыша берсе болот. Бирок, мелдешти уюштуруучулардын айтуусунда, ар бир катышуучунун деңгээлине жараша жарыштырмакчы. Анткени, бул чемпионат атайын машыккан спортчулардан сырткары, каалоочулар ортосунда да өтүп жаткандыктан, мындай ыкманы колдонуу ыңгайлуу. Абайлагыла деги, буту-колуңарды чыгарып албагыла. "Казды туурайм деп карганын буту сыныптыр" болбосун...

"Лилль" акесин эмес атасын утту
Франциянын футбол боюнча өтүп аткан чемпионатында "Лилль" футбол командасы атаандашы "Марсель" тайпасын 2:1 эсебинде утуп кетти. Өткөн кылымды айтасың, тээ 1899-жылдан бери футболдун акесин окутуп келаткан бу команда 1944-жылы түзүлгөн "Лилль" тайпасынан утулуп калуусу күйөрмандардын бүйүрүн кызытты. Көрсө, "күч атасын тааныбайт" деген ушу тура. Оюнга келсек, "лиллчи" Эден Азар оюндун онунчу мүнөтүндө оюн эсебин ачып, өнөктөштөрүнүн шаабайын суутууга жетишти. Экинчи таймда Пьер-Ален Фро экинчи топту дарбазага киргизүү менен атаандаштарын жеңиштен биротоло түңүлттү. Өлкөдө азырынча, жеңишке жеткен "Лилль" менен "Ренна" 49 упай менен алдыда келатат. Ал эми "Марсель" командасы 45 упай менен 4-орунда калды. Ошондо Франциянын чемпиону болуп жүргөн "Марселди" жеңген "лиллчилер", акесин эмес атасын уткандай эле болду. Канткен менен карылык деген карылык да...

Россиялык лыжачы
"уверенно" сүйлөйт да
Норвегияда өтүп аткан кышкы спорттук оюндар боюнча дүйнө чемпионаттыгында орусиялык Максим Вылежкин күмүш байгени өзүнө багындырды. Бул лыжачы жарышта 1 саат,7 секунд аралыгында 50 чакырымды басып өткөн. Жөө күлүктөрдөй эле чуркайт экен да бул, бутунда лыжасы бар экенин унутуп калгансып... Андан кийин норвегиялык Турд Асле Гьордален келип, үчүнчүнү камсыздай алды. Жарышта экинчи келген орусиялык спортчу сүйүнгөнүн жашыра албай, мындан кийин болушунча машыгууну башынан өткөрүү менен биринчиликти камсыз кыларын уверенно айтты, эй! Белгилей кетсек, бул чемпионатта Норвегия 8 алтын, 6 күмүш, 6 коло медалды топтоп, биринчи орунда келатат. "Жер тартат" деген ушу да. Экинчи орунда 7 алтын, 2 күмүш, 1 коло байге менен Австрия мүмкүнчүлүктү колдон чыгарбоого тырышууда. Андан кийинкиси Швеция мамлекети. Булар 2 алтын, 2 күмүш, 1 коло төш белгиге ээ болушту.

Улукбек КУТМАНБАЕВ




Хей Кличкого каршы!
Англиялык оор салмактагы кайыш кол капчан мушкер Дэвид Хэй дүйнөнү дүңгүрөтүп келген украиналык боксчу Владимир Кличко менен бетешүү үчүн атайын келишимге кол койду. Түзүлгөн келишимге ылайык, Германияда ушул жылдын 25-июнунда же болбосо 2-июлунда көпчүлүк күткөн былчылдашуу орун алмакчы. Азырынча беттештин так күнү белгилене элек. Эки чоң муштум мушкерлер буга чейин беттеште кез келишип, биринде бири утса, кайрадан жеңилип калышмай адаттары бар. Британиялык мушкер болсо Кыргызстанда төрөлгөн украин Кличконун кенжесин "нокаутка чаап салам" деп ишенимдүү айтууда. Ага жетүү үчүн болгон күч-аракетин жумшап, күн-түн дебестен жанүрөп машыгуунун үстүндө.
Ал эми Владимир Кличко үстүбүздөгү жылдын 30-апрелинде дагы бир англиялык Дерек Чисорой менен күч сынашмак. Ага ылайык бир эмес эки жолу келишим түзүлгөн. Анан кашайып өтүп кеткен жылдын декабрь айында курсак жагынан жараат алгандыктан, дарыгерлер уруксат бербей коюшкан. Намысына чыдабаган Кличко өз жараатын уруп ойнобостон "Чисоройдун акесин окутуп коём" деп айкырып чыккан. Кыйкырыктан кулагы тунган дарыгерлер, жанүрөп атып, түзүлгөн келишимди бузууга көндүргөн экен. Ошентип, апрелде Владимир Дерек менен кез келишпей калды. Анын ордуна кум салынган мүшөктү койгулап. Эми Хей менен контракт түзгөн Владимир июнь айдын аягына чейин ден-соолугун жакшыртпаса, спорттогу эларалык кадыр-баркы төмөндөп калуу коркунучу бар.
Хей менен Кличконун ортосунда дагы кызыктуу маселе болгон. 2009-жылы да бетешүүгө келишим түзүп, ал учурда Хейдин ден-соолугу талапка жооп бербегендиктен, кайрадан контракт бузулган. Эмки кезек Кличкодо болуп жүрбөсүн. Байкай туралы.




Кулактандыруу!
"Жети Нур" борбору Мухаммад (САВ) Пайгамбары-быздын туулган айына карата Пайгамбар жөнүндө мыкты обонго сынак жарыялайт. Обону да, сөзv да мыкты болгон ырларды дискке жаздырып алып келиңиздер. Сынактын жүрүшү 1-апрелге чейин. Жеңүүчүлөргө: 1-орун 20 000 сом, 2-орун 15 000 сом 3-орун 10 000 сом. Сыйлыктар апрелдеги "мавлют" кечесинде тапшырылат.
Сурап билүү
10-17ге чейин:
0312 32 50 85,
0559 77 11 41.
Объявление
Фрунзенский мехлесхоз обьявляет конкурс на право аренды земель лесного фонда. Земли находятся на административных территориях Аламудунского и Сокулукского районов в радиусе 40 км от черты г. Бишкек, на богарах. Размер участков до 10 га.
Заявки и конкурсные предложения принимаются по 20 марта 2011г. По адресу г. Бишкек ул. Майрам,69.
Тел: (312)529107,
Факс.(312)529105





кыргыз тилиндеги гезит "Лозунг"




Яндекс.Метрика