п»ї
 
Эне сыйлаган элден алкыш! Ыйманды саттык дейбиз. Ынсап кетти дейбиз. Чын эле экен. Анткени пейил тарып баарыбыз бири-бирибиздин жакшылыгыбызды көрө албай, жалаң гана жаман жагыбызды айтып калдык. Өзгөчө акыркы жылдары. Бейиштей жаркын мекенибизде жок дегенде бүгүн чындыктын курун моюнга салып туруп, бир адамга ЫРАКМАТ ыроолоп койбойлубу. Өлкө канга чыланып ак менен кара, калп менен чын алпурушуп, кырчындай жигиттерибиз атылган октон чым жазданып кырылып жатканда "Мен кыйын" деген саясатчы жигиттерибиз Роза Исаковнанын этегине баш калкалап беришти. Албетте акыйкатын айтканда ал нерсе тарыхый жана саясий зарылдыктан келип чыкканын моюндайбыз. Бирок, ошол зарылдыкты жеке кызыкчылыгына буруп кетпей, өлкөгө кыйын кырдаалда сап болуп бергени үчүн эле биз азыркы ажо айымга Кыргыз Эл Баатырлыгын берсек да жарашат. Туура, бүгүн Отунбаева эч бир кошоматка же сыйга муктаж эмес, бирок, тарыхты кантип танабыз? Бир эмес эки кандуу капсалаңды камырдан кыл суургандай басты. Өлкөнүн аброю үчүн бир эмес эки ирээт БУУнун чоң трибунасында сүйлөп, кыргыз ачыктыкты, тазалыкты, адилдикти сүйгөн эл экенин даңазалады. Мына бүгүн да дүйнөнү таң калтырып өзгөчө "түшпөс ханга" айланган КМШ лидерлери үчүн үлгүлүү иш жасап, Орто Азияда деле бийликти тынч өткөрүп берсе болорун далилдеди. Кыргыздын уюткусун улап, мындай батылдыкка барып жатышы келечек үчүн жакшы жөрөлгө. Бүгүн келген президентибиз да эртең ушу жол менен куулбай, кубанып кетишин азыр ар бир жаран каалап отурат. Жана бир жолу ыракмат Роза Исаковна. Сиз чапкан жол дайым болочоктогулар үчүн үлгү болсун... "Кереге-ПРЕСС" |