mainkaptal
Кыргыз гезиттер
Эт эмес же
чел эмес...
Кулматов деген мэр болуп, иштин баарын "алчы" тургузат деген кеп тарап, баарыбыз тегиз туруп алып ураалаган элек. Ураалабай калалык. Мурун угуп келбедик беле өзүбүз да, Жолдошованын жардамы менен билчүбүз: "Кулматов Бажы кызматын талкалап бүттү" деп жыйын сайын айтып, эскертип турганынан… Анан Чүй облусун жетектеп кеткенде дымы чыкпай калды. Карпайым эл түгүл, аткаминерлердин эсинен чыгып кетти. Бирок жөргөмүштүн желесиндей болуп илешкен жеринен чыкпаган неме көрүнөт, чамасы чарк экенине карабай чоң кызматты басып жыгылат, түгөттүкү. Айла жок Кулматов Бишкектин мэри болуп келгенде жыргатпасын билсек да, үмүт кылганбыз, эми уяты болсо кыймылдаар деп. Үмүтсүз шайтан дешет, биз адамбыз да. Бул Кулматовуң шайтандан жаман окшойт, үмүтүбүздү да талкалап салды. Өмүркулов жаман болгону менен шаарда бак-дарактар, темирге "илинген" гүлдөр суу иччү эле! Бу Кулматов дегениң, жадагалса бак-дарак, гүлдү оңдуу сугара албай койду го, чиркин.
Канча жылдан бери Бишкектин бак-дарактары, Өмүркуловдун тушунда милиондогон сомго сатылып алынган гүлдөр кулпунуп турчу. Ошону Кулматовго айтса, куудулданган болуп: "Биз деген суу үчүн согушуп жатабыз" - деп жатпайбы. Көп сөз айтпайлы, ошонун негизинде бир сөз менен айтканда мэрге тунуппуз! Ушул Кулматов мырза эч качан, ооба, эч качан эл күткөн мэр болуп бере албасы аз өтпөй айкын болду. Анан ушул кантип эл башкарсын. Айрымдар айтып жүрүшпөйбү, президенттин мураскору катары сыпаттап. Бир шаарды эптей албай таштанды менен аралашып калса, анан ушул неме өлкөнү кантип башкарат? Кудай ылайым мындай эт эмес же чел эмес сары суу болгон, мажүрөөдөн сактасын.

Баратбай Аракеев




Кулматовдун ишине канаатанасызбы?
Сурат Жылкычиев,
журналист:
- Кубанычбек Кулматовдун ордо калаабызга мэр болуп келгени тыңгылыктуу эч нерсе жасаган жок. Жасаарына үмүт жок. Болоор уул богунан. Бу киши шаар башчылыгына жарабайт. Мүмкүн башка иштердин майын чыгарып жаткандыр.

Султан Жумагулов,
ЭлТР каналынын башкы директору:
- Мэр беш айда жаңы жол сала албайт, туура эмес салынып башталып калган имараттарды да ордунан жылдыра албайт. Менимче, бүгүн таңдан тарта Токтогул жана башка көчөлөрдү жаап, ремонттоого киришти окшойт, кымгуут эле болуп жатып калдык. Ушул иш-чаралар жолдогу тыгынды канча азайтат экен - ошондо көрүнсө керек. Таштандылар кээде тоодой үйүлүп кетип жатат. "Тазалык" деген ишкананын ичин "тазалап" жатышат окшойт. Чоң реформаларды жасаш үчүн оболу структуралык өзгөртүүлөр керек болот. Бул деген кызматтарды жаңыртуу, кадрларды ооштуруу деген узак жана түйшүктүү процесс. Ошондуктан, мен шаар тургуну катары азыр эле так кесе жаман же жакшы деп баалагандан алысмын. Бирок жыл соңунда билинип калат кудурети.

Тынчтык Алтымышев,
журналист:
- Кулматов ташбака жүрүш менен кетип баратат. Өмүркуловдун учурундагыдай жолдорду оңдоо, көчөлөрдү көрктөндүрүү деген нөл. Мына, анын жол куруучулары Арча-Бешиктеги былтыр салынган жаңы жолдун (Түштүк Магистраль - Чортеков) жөө адамдар басуучу жээгин 2 айдан бери бүтө албай койду. Кызыгы, жол жээгиндеги үйлөрдүн ээлери акча жыттатып койсо, короосунун ичинен бери асфальттап берип жатат. Бул коррупцияны көрбөгөн, ал көчөлөрдөгү иштерге бир басып барбаган Кулматовдун дагы эмнесин сурайсыңар?!

Кубатбек Байболов,
коомдук ишмер:
Кыргыздар кызык калкпыз. Адамды кызматка алып бараардын алдында ага баам салып, анын ким экендигине маани бербейбиз. Качан гана кызматка баргандан кийин "мен бул кызматкерден көптү күттүм эле, үмүттү актаган жок" деп чыгабыз. Мен мисалы Кубанычбек Кулматовдон эч нерсе күткөн эмесмин жана ал мэр болсо, абал ушундай болоорун башында эле айткам жана айтып келем.

Бакыт Жетигенов,
"Ар-Намыс" фракциясынын депутаты:
Мэрде күнөө жок, мэр иштеп эле жатат. Күнөө мэриянын алдындагы "Тазалык" ишканасында жана башка мэрияга караштуу кызматтарда болуп жатат. Мэр азыр ал кызматтардын жетекчилерин алмаштырып, ишти жаңыча баштоого аракет кылууда. Буюрса, иш жаман болбойт. Мэрдин иштешине бут тосуп, саботаж кылгандар көп. Бирок мэр алардын аракетине моюн сунбай, иштейт деген ишеничтемин.

Азиза Абдрасулова,
укук коргоочу:
Мэр кол алдындагы кызматкерлерин көзөмөлдөй албай жатат. Мисалы "Тазалык" ишканасынын жетекчисин. Эгер көзөмөл болуп, жакшы иштегенде абал мындай болмок эмес.








Яндекс.Метрика