Кыргыз гезиттеринин жањылыктары •
Кыргыз гезиттери



Кыргыз гезиттер
Элесин эскерип…
Насипа Садыркулова,
маркум Медет Садыркуловдун апасы:
"бакиев үйдөн былчыя тамак ичип эле жүрчү…"
Маркум Медет Садыркуловдун киши колдуу болуп курман болгонуна 13-мартта беш жыл болот. Учурда өлтүргөн деп шектелген күнөөлүүлөрдүн жарымы камакта, ал эми Жаныш Бакиев баштаган күнөөлүүлөрдүн ана башчылары камалбай тышта жүрөт. Бүгүн биз маркумдун апасы Насипа апаны жана иниси Болот байкени кепке тартып, учурда каралып жаткан соттук процесс жана маркумдун өмүр таржымалы тууралуу кыскача маектештик…
- Насипа апа жакшысызбы, ден соолугуңуз жакшыбы?
- Ден соолугум жакшы эмес, бирде ооруп, бирде жакшы болуп калам. Карылык да, жашым сексен алтыга келди. Көбүнчө бутум ооруйт, кээде баспай калам. Баарынан санаа, күйүт жаман тура. Медетимден айрылганы оорукчан болуп калдым. Абышкам дагы ооруп жүрүп, билсеңер керек, мурдагы жылы каза болбоду беле. Менин азыр тилегеним эле баламды өлтүргөн Бакиевдер кармалып, жазага тартылса дейм. Көзүм өткөнчө күнөөлүүлөрдүн жазага тартылганын көрүп кетсем деп Кудайдан тилейм. Абышкам да ошентип тилеп жүрүп өтүп кетти.
- Канча уул, канча кызыңыз бар, Медет ага канчанчысы эле?
- 5 уул, 2 кызды тарбиялап өстүрдүм. Медетим үчүнчүсү болчу. Медеттен улуу Мелис, Жакшылык, андан кийин Болот, анан Рашид деген уулдарым бар. Кыздарым Бактыгүл, Зейнегүл. Учурда кичүү балам Рашиддин колунда турам.
- Медет ага башка уулдарыңыздан эмнеси менен айырмаланчу эле?
- Медетим дилгир эле. Мектепти бешке окуду. Лыжаны жакшы тепчү. Бала кезинде лыжа тээп эле чоңойду. Балдарыбыздын баарын окутуп, жогорку билимдүү кылдык. Кыздарым медик, дарыгер болуп иштешет. Абышкам балдарга аябагандай кам көрөөр эле. "Мен эле иштейм, балдарды иштетпе, окушсун"- деп балдарды такыр иштеткен эмес.
- Абышкаңыз ким болуп иштеди эле?
- Тракторист болуп иштеген. Мен болсо үйдө торпок бакчумун. Балдарды ошентип эле иштеп, багып чоңойттук. Ошондой эле Медетим уюштургуч эле. Бир нерсени бат эле уюштура калчу. Мектепти бүтүп, студент болгондон тартып эле иштеп, айылга келип, айылдагы жаштарды чогултуп, аларга ар кандай кеп-кеңешин айтып жардам берип жүрдү. Азыр ошол балдар Медетти айтып эскерип турушат, "Медет байке жаш кезинде эле бизди ушинтип тарбиялачу эле" -дешип.
- Медет ага менен акыркы жолу качан жолуктуңуз эле?
- Өлөөрүнө жакын, 8- март күнү жолуккам. Мен анда ооруп, ооруканада болчумун. Медет ооруканага барып мени чыгарып, үйгө алып келип майрамдатып: "Апа мен Казакстанга кетип жатам, буюрса эки-үч күндө келем, анан сизди Кеминге айылга алып барам"- деген. Кетип баратып: "Апа батаңды бер, аман-эсен барып келейин",- деп бата алган. Ошондо жанында Сергей Слепченко жана Кубат Сулайманов бар болчу. Аларды мен өз көзүм менен көргөм. Алар мага учурашып, ден соолугумду сурашкан.
- Бакиев, дагы башка чоңдор Медет ага менен үйгө барып турчу беле?
- Бакиев көп эле жолу барды. Былчыя тамак ичип эле жүрчү. Тамагымды ичип, үйүбүздөн даам сызып жүрүп, анан кантип баламды өлтүрдү билбейм. Жеткен канкор тура. Салымбеков, Байболов жана башка чоңдордун баары эле барып конок болуп кетишчү.

Болот Садыркулов,
маркум М. Садыркуловдун иниси:

" Эркин Исаков мени мыйзамсыз бошоткон…"
- Болот ага, агаңыз М. Садыркуловдун өлүмү боюнча жүрүп жаткан сот процесси боюнча эмне айта аласыз?
- Ачыгын айтканда, башында эле сот туура эмес чечим чыгарган. Биз соттун чыгарган чечимине нааразы болуп, апелляциялык арыз менен кайрылганбыз. Ошондон бери улам бир шылтоону айтып эле соттун чечимин создуктуруп келе жатышат. Жакында эле сот аяктап калганда конституциялык палата чечим чыгарды деп, дагы созуктурушту. Күнөөлүүлөр жасаган кылмыштарынын баарын эле айтып берип, моюндарына алышты. Кантип өлтүргөнүн, кимдер буйрук бергендигинин бардыгын. Бирок сот ошонун баарын эске алып туруп эле чечим чыгарбай жатпайбы.
- Анда сотторго кысым болуп жатса керек да…
- Албетте кысым болуп жатат да. Болбосо сот эмнеге мынча создуктурулмак эле. Күнөөлүлөр эптеп акталып кетүүнүн аракетин көрүүдө. Мен ойлоп атам, Жаныш Бакиев каражат жагынан каржылап, кийлигишип жатабы деп. Сотко учурда эч ким көңүл бурбай калды, журналисттер да катышкан жери жок. Журналисттерден эмнеге катышпай жатасыңар десем, "иш актуалдуулугун жоготту"-дешет. Актуалдуулугун жоготкондон кийин иш бүткөн экен да дедим. Ал эмес, апрель революциясы боюнча каралып жаткан сот дагы актуалдуулугун жоготту дегендер жок эмес. Эгер апрель революциясы боюнча каралган сот актуалдуулугун жоготсо, анда биз кайда баратабыз деген ой келет.
- Апрель революциясына чейин чыгыш автобекетинде директор болуп иштечү элеңиз, революциядан кийин эле кызматтан кеттиңиз, себеби эмнеде?
- Байкем өлгөндөн кийин эле Бакиевдер мени да аңдып, ишимди жөнү жок текшерип, жакшы иштетпей коюшту. Революциядан кийин Транспорт министри болгон Эркин Исаков мага: "Сенин ордуңду чоңдор сурап жатат, сен кызматтан кетишиң керек",-деди. Кайсы чоң сурап жатат, Бабанов сурап жатабы десем айткан жок. Укугумду коргош үчүн ал кездеги Каржы полициясынын жетекчиси болуп иштеп турган Эркин Булекбаевге бардым. Ага айтсам, ал Эркин Исаковго телефон чалып: "Эмнеге жумуштан алып жатасың десе, ал Болот Садыркулов Бакиевдин кадры да",- деди. Мен каяктан Бакиевдин кадры болмок элем, алар агамды өлтүрүп, мени кордоп жатышса, ошентип кызматтан алынып, ордума Эркин Исаков Кубанычбек Жумалиевдин Казыбек деген өкүл баласын дайындаган. Учурда директор болуп ошол Казыбек иштеп жатат. Мага кызматтын деле кереги жок болчу. Эркин Исаков министр болгондон кийин "сиз баланча жыл иштептирсиз, эми эс алыңыз, башкалар иштесин" деп сылык-сыпаа узатып ийсе болмок да. Опузалап, ордуң чоңдорго керек болуп жатат дебей. Ошентип, Эркин Исаков кызматтан кеткенден кийин азыркы министр Калык Султановго барып болгон окуяны айтсам: "Ал мен сенин ким экениңди жакшы билем, сен Эркин Исаковду сотко бер"- деди. Сотко берип, сот менин ишимди туура деп таап, "Бирок сен кеч бергенсиң, эртерээк берсең жакшы болмок"- деп ишти жакшы карабай жатат.
Даярдаган
Мирлан Алымбаев






Пикир:

Яндекс.Метрика