presskg.com Архив Редакции газет Кыргызстана Кыргыз эл макалдары Zaman Кыргызстан Агым 1 Агым 2 Айыл деми Алиби Асман пресс Азия news Арена kg Фабула Кереге kg Кыргызстан маданияты Көк Асаба Кутбилим Леди kg Майдан.kg Кыргыз туусу Учур Айгай kg Аалам С.С.С.Р Эл турмушу Эл сөзү Добулбас kg Айкын саясат Ачык саясат Майдан kg Адилет press Жалал-абад үнү Тарыхый мурас Обон Кыргыз руху Diezel Айыл өкмөтү Нур Эл De факто Жаңы кылым Апта Бишкек таймс Назар Энесай Эркинтоо Нур реклама Айат пресс Адилет пресс Лозунг Кабар



  Ширин Айтматова, "Ата Мекен" фракциясынын депутаты:

"Менин фамилиямдын
өзү эле чоң саясий платформа"
Элдин жүгүн аркалоо жеңил иш эмес экендигин баарыбыз жакшы билебиз. Өзгөчө саясий чөйрөдө жүрүү бир үйдүн куту болгон аялзаты үчүн төө көтөргүс түйшүк экендигин танууга мүмкүн эмес. Азыркы парламентте элдин жүгүн көтөрөм деп жүргөн айым депутаттарды коомчулук менен тааныштырууну чечтик. Бүгүнкү маектешибиз "Ата Мекен" фракциясынын депутаты, залкар жазуучу Чыңгыз Айтматовдун кызы Ширин Айтматова болмокчу. Ширин Чыңгызовна менен саясат туурасында гана эмес, коомдогу жөнөкөй аялзаты катары да баарлаштык.

Кыскача маалымат:

Аты- жөнү:
Айтматова Ширин Чыңгызовна
Туулган жылы: 1977- жыл
Билими: жогорку
Кесиби: филолог
Үй- бүлөлүк абалы: бир кыздын энеси
Билген тилдери: англис, орус, француз тилдеринде эркин, немис, япон, итальян жана корей тилдеринде пикир алыша алат. Кыргыз тилин үйрөнүүдө.


- Эл жүгүн аркалап депутат болушуңузга, деги эле саясатка аралашууңузга эмне түрткү болду?
- Рахмат. Бала чагымдан эле саясатчы болууну көздөчүмүн деп айта албайм, бирок мен саясий-чыгармачыл чөйрөдө чоңойгом. Атам экөөбүз маектешкенди жакшы көрчүбүз. Ошондо мен: "Ата, саясатчылар бийликке ашыкча умтулган, өз кызыкчылыктарын гана жактап, элдин камын көрбөгөн адамдар болушат ээ" - деп айтсам, ал мага: "Саясатчы болуу бул - чоң милдет. Эл арасынан тандалган гана инсандар бул кесипти аркалай алат"-деп айтар эле. Атамдын ошол кездеги айткан сөздөрү мени терең ойго салчу. Саясатка аралашууга кадам таштаганга чейин бир далайга чейин өзүмдү изденүүдө болдум. Убакыттын өтүшү менен менин дагы саясатка болгон көз карашым өзгөрүлдү. Атам тандагандай жолду тандап алуудан чочулабайм. Анткени атам саясий жактан мага жакшы үлгү болгон.
- Атаңыздын арты менен депутат болду деген сөздөргө кошуласызбы?
- Албетте, менин фамилиямдын өзү эле эң маанилүү саясий платформа. Ал эми жеке өзүм үчүн чоң жоопкерчилик. Белгилүү адамдардын балдары ата-энесинин тааныштары, байланыштары аркылуу ар кайсыл тармакты тандашат. Саясатка келишиме туугандарым эч кандай көмөк көрсөткөн жок. Курдаштарымдын арасындагы активисттер саясатка жаңы аралаша баштаганымда мага ишенишип, мени абдан колдоп беришти, ушул күнгө чейин колдоп келе жатышат. Элимдин жүгүн көтөрүүгө аттанган оор мезгилде өз жардамдарын аябай, колдоо көрсөткөндөрү үчүн аларга ыраазычылыгымды билдирем.
- Жогорку Кеңештин трибунасында элдин көйгөйүн чечүүгө мүмкүнбү?
- Жогорку Кеңеш бийликтин маанилүү бир бутагы катары ар бирибиздин ишенимибизге ээ болуп турушу керек. Учурдагы парламент жаңы мыйзам долбоорлорун кабыл алуу менен кыргыз жарандарынын кызыкчылыгын көздөп, мындан аркы жашоону жакшыртуу аракетин кылып жатат. Бирок мурунку Совет системасы катуу турукташып калгандыктан, азыркы учурда өзгөрүүлөрдү киргизүү бир канча кыйынчылыктарды туудурса керек. Эгерде "Ата Мекен" партиясы көпчүлүк добушту алганда, Грузия жана Монголия мамлекеттериндегидей элдин кызыкчылыгын көздөгөн көптөгөн реформаларды жүзөгө ашырмакпыз.
- Азыркы чакырылыштагы парламент купулуңузга толобу?
- Ооба. Азыркы чакырылыштагы парламент элдин тандоосу менен келгенден кийин, мен сындагандан алысмын.
- Бүгүнкү азык-түлүккө болгон кымбатчылык сизге да өз таасирин тийгизип жатабы?
- Азык-түлүккө болгон кымбатчылык бүткүл кыргыз элине гана эмес, дүйнө жүзүндөгү бардык калкка өз таасирин тийгизүүдө. Көпчүлүккө белгилүү болгондой, учурда кызымды жалгыз тарбиялап жатам. Ошондуктан азыркы азык-түлүк каатчылыгы өз таасирин биздин үйгө да тийгизүүдө деп айтсам болот.
- "Чет мамлекеттен алган билимимди өз өлкөмдүн экономикалык жактан өсүүсүнө жумшайм"-дегениңизди уктук эле. Кыргыз мамлекетинин экономикасын көтөрүүгө кандай сунуштарыңыз бар?
- Чет жакта окуган кыргыздын улан-кыздарынын жашоого болгон көз караштары, бул жактагы жарандарга караганда бир канча айырмаланып турат. Чет өлкөдөн алган билимимди мен дагы өз өлкөмдүн пайдасы үчүн колдонуп келе жатамын. Биздин экономикабыз өнүгөт. Эгерде паракорлукту жеңип кетсек, азыркы базар экономикасында ишмерлерге болгон тоскоолдукту жайсак жана биздин өкмөттө мыкты экономикалык программалар иштелип чыкса. Кыскасы, "иштеш керек" дейт элем.
- Улуттук тил комиссиясы кыргыз тилин толук кандуу билбеген чиновниктерге кызматтан кетүү талабын коебуз деген пикирлерди айтышууда. Эгер сиз сынактан өтпөй калсаңыз, мандатыңызды тапшырууга даярсызбы?
- Негизги мыйзам боюнча депутат болуп башка улуттун 30 пайыз өкүлдөрүнөн шайланышы керек. Ал депутаттарга кыргыз тили боюнча сынак жүргүзүлбөйт. Кыргызстанда жашагандан бери кыргыз тилин жакшыраак өздөштүрүүгө жакшы шарт түзүлдү. Учурда жумасына 5 жолу кыргыз тили сабагын окуп жатам. Мен үчүн бүгүнкү күндө элимдин мага көрсөткөн ишеничин актап, атамдын татыктуу кызы болсом - чоң жетишкендик болот.
- Ыңгайсыз суроолор берүүсүндө "Мен уурдаган эмесмин" - деп айттыңыз эле. Бул сөзүңүзгө таянсак, мамлекет башында мамлекеттин мүлкүн уурдагандар да бар экен деп түшүнсөк болобу?
- Мен уурдаган эмесмин деген сөздүн төркүнүн сиздер туура эмес талдап алсаңар керек. Ал телеберүүдөгү берилген суроолорго эч кимге тийиштирбей жеке өзүм үчүн гана жооп берген болчумун.
- Сиз атактуу жазуучунун кызысыз. Адабиятка жакынсызбы? Атаңыздан башка кыргыз жазуучуларынан кимдин чыгармасын баалайсыз?
- Менин кесибим адабият менен тыгыз байланышта. Бишкектеги Борбор Азиялык Америка университетинде иштеп жүргөндө студенттерге америкалык жазуучулардын адабиятынан сабак берчүмүн. Өзүм да адабиятка жакынмын. Бош убактым боло калса эле китеп окуганга шашылам. Кыргыз элинин жазуучуларынан Казат Акматовдун чыгармаларын баалайм. Мен аны уникалдуу жазуучу жана кудай берген таланты бар, залкар адамдардын катарына кошом.
- Аталаш бир туугандарыңыз менен катышып турасызбы?
- Аталаш бир туугандарым менен мамилебиз жакшы эле. Бирок күн алыс жолугушуп турууга мүмкүнчүлүгүбүз жок. Себеби ар кимибиз өзүбүздүн үй-бүлөбүз жана жумуштарыбыз менен алекпиз. Иним Элдар экөөбүз абдан жакынбыз. Бири-бирибизди ар дайым колдоп, оорубузду колдон, жеңилибизди жерден алып турабыз.
- Өзүңүздү патриотмун деп эсептейсизби?
- Эң жакшы көргөн өлкөм - Кыргызстан. Өзүмдү патриотмун деп эсептейм. Кыргызстандын келечеги биздин колубузда. Ата-бабаларыбыздан келе жаткан үрп-адаттарыбызды, каада-салттарыбызды азыркы жашоонун талабына ылайык сактап жана мындан ары алып кетиш биздин парзыбыз деп эсептейм.
- Кыргыз беш бармагын жасай аласызбы?
- Албетте, кыргыздын улуттук тамагы болгон беш бармакты жасай алам. Беш бармак кыргыздын эң даамдуу тамагы деп ойлойм. Камыр жайып, гүлчөтай жасаганды катырбасам да, ашканада мыкты эле кожейкемин десем болот.
- Уй сааганды билесизби? Билбесеңиз үйрөнөйүн деген ниетиңиз барбы?
- Уй сааганды билбейм. Шаар ичинде бардыгыбыз эле сүттү сатып алабыз да. Эгерде ошондой шартка туш болуп калсам, тез эле үйрөнүп кетмекмин. Адамзатынын колунан келбеген нерсе аз болсо керек.
- Өзүңүздү ак колмун деп эсептейсизби?
- Мен өзүмдү ак колмун деп эсептебейм. Аялзатына тиешелүү жумуштардын бардыгын жасайм. Бош убактымда ар кыл улуттун даамдардын жасап, кызым Кира Кереметти жана жакын адамдарымды кубантканды жактырам.
Маектешкен
Жаркынай Кадыркулова





кыргыз тилиндеги гезит "Форум"





??.??