кыргыз тилиндеги гезит "De-факто"




Роза Отунбаева кечирим сурады

Роза Отунбаева кечээ 30-октябрда Жогорку Кеңешке келип, Президент катары депутаттарга кайрылуу жасап, коштошуу сөзүн айтты. Ал Кыргызстандын соңку 20 жылы биздин тандоо эркиндигибизди уурдоонун, аны акырындык менен басып алуунун жылы болгонун, бул барып-келип, бийликти күч менен тартып алууга мажбурлап келгенин жар салды. Өзү болсо бүгүн тактыдан кетип, бийликти мыйзамдуу өткөрүп берип атат.

"Биринчи революция сабак болгон жок, биз мурдагыдан да катаал авторитардык режимге туш болдук. Бардык ресурстарды ээлеп алуу, саясий киши өлтүрүү, акырында келип бийликти атадан-балага мураска калтыруу принцибин орнотуу аракеттери элдин чыдамын чыңап, акыры барып жарылууга алып келди. Ооба, биздин жүзгө жакын мекендештерибиздин каны менен акыйкаттык орноду" деди эки революциянын эмнеге чыкканына токтолуп. Эки президентин кууп чыгып, алты референдумду жана Конституциянын сегиз өзгөртүүсүн, ошондой эле эки революцияны жана түштүктө этностор аралык кагылышууга түрткөн чагымчылдыкты башынан өткөргөн Кыргызстандын мындан ары төмөнкү рецепттер менен иштеш керек деди:
1. Кыргызстан эли менен эсептешпей коюуга болбойт, анткени ал реалдуу күч.
2. Эч кимдин бийликти жеке ээлеп алууга (узурпациялоого) акысы жок. Бийлик аны кыянаттык менен пайдаланууга мүмкүн болбой тургандай болуп түзүлүүгө тийиш.
3. Өлкөнүн лидерлери элге берген убадаларын так аткарышы абзел.
4. Саясатчылар коркутуу жана күч колдонуудан алыс болуусу керек, анткени ар кандай күчкө каршы турган күч дагы табылат.
Дал ушул 7-апрелден кийин Убактылуу Өкмөттүн айрым мүчөлөрү люстрация идеясын көтөрүп, бирок ал ишке ашпай калган эле. Бул боюнча Роза Отунбаева "ачыгын айтуу керек, элитанын орчундуу бөлүгү эки авторитардык режимге тең аралашып иштешкен эле. Алар бул үчүн моралдык да, керек болсо бир тобу кылмыш жаза жоопкерчилигин да тартышы керек. Бирок саясий атаандашуунун легитимдүү талаасынан сүрүп чыгаруу менен биз аларды көмүскө күрөшкө мажбур кылмак элек. Азыр отурушмак да бычактарын кайрап" деп түшүндүрүп, ошол учурда жаңы төңкөрүштү каалабаганы үчүн ушуга барганын түшүндүрдү.
Ошентип, Кыргызстандын 20 жылдык тарыхында биринчи жолу президент гүл менен бийликтен кетти. Трибунадан түшөөр астында Роза Отунбаева "Мен өз милдетимди так аткардым деген сезим менен бардык жоопкерчиликти жана үмүттү мыйзамдуу шайланган парламент менен президентке артып кетип жатам. Мен Кыргызстан элинин баатырлыгына жана көсөмдүгүнө таазим кылып, кан төгүүнү болтурбай токтотуп кала албаганым үчүн кайгыруу сезимим менен дагы бир жолу кечирим сурайм! Ошол эле мезгилде өлкөнүн бүтүндүгү жана элибиздин биримдиги сакталып калгандыгы үчүн сыймыктанам! Мен өз күчүм жеткен иштерди турмушка ашырдым. Элдин алдында абийирим таза! Калганын тарых таразалайт" деген президентти эл өкүлдөрү жапырт туруп, кол чаап узатышты.

Санжи Туйтунова




"Кыргыз руху" гезитинин башкы директору Арстанбек Дүйшөмбиев камакка алынды
"Кыргыз руху" гезитинин башкы директору Арстанбек Дүйшөмбиев баңгизат сатууга тиешеси болушу мүмкүн деген айып менен камалды. Арстанбек Дүйшөмбиевге каршы баңгизат менен кармалган Молдогазиев аттуу адам көрсөтмө берген.

"Кыргыз руху" гезитинин башкы директору Арстанбек Дүйшөмбиевге каршы көрсөтмө берген Молдогазиевдин өзүнөн 8.5 килограмм героин, үйүнөн 13 килограмм героин, жасалма 500 сом, тапанча жана патрондору табылган. Ал эми баңгизат сатууга тиешеси бар деп шектелген Дүйшөмбиевдин жумушчу кабинетин тинтүү учурунда бир канча кызматтык күбөлүктөр, анын ичинде ИИМдин, ИИМдин Кылмыш иликтөө башкы башкармалыгынын, ар кандай жоопкерчилиги чектелген коомдордун мөөрлөрү, бир канча паспорт, ИИМдин Кылмыш иштер башкы башкармалыгынын автомобилдик номерлери табылган.
2011-жылдын 26-октябрында ИИМдин баңгизаттарга каршы күрөшүү кызматы ири өлчөмдө баңгизат жолун буугандыгы тууралуу маалымат беришкен. 26-октябрда кечки саат 8де Кара-Балта-Бишкек жолунда, Жайыл районунун Кызыл-Дыйкан айылында улут аралык баңгизат тобунун активдүү бир мүчөсү кармалган. Андан кийин иликтөө иштери улантылып, 28-ноябрда шектелгендерди камакка алуу санкциясы берилген.
"Кыргыз руху" гезитинин кызматкерлери башкы директор мындай ишке барышы мүмкүн эместигин айтышат. Гезиттин баяндамачысы Тенти Орокчиев: "Мындай кабарды уккандан бери таң калып жатам. Жакшы ишкер жигит, андай иштерге барышы мүмкүн эмес эле", - деди.
Ушул эле кезде ЖК депутаты Дастан Бекешовдун бир тууганы Руслан Бекешов баңгизатын тараткан деген шектелүү менен кармалгандыгы тууралуу маалымат таралып жатат. Муну Дастан Бекешов укук коргоо органдарын көп сындаган саясий ишмердиги менен байланыштырып, укук коргоо кызматкерлери ушундай жол менен ЖК депутатына маалымат "согушун ачканы" тууралуу билдирүүдө.
Кантсе да, шектелгендердин ак-карасын укук коргоо органдары териштирип, жыйынтыгын коомчулукка жарыя кылышаар. "Бир уйдун мүйүзү сынса, миң уйдун мүйүзү зыркырайт" дегендей, жалпыга маалымдоо каражаттарынын өкүлдөрү да тынчсызданып, бул иштин ак-карасы адилет иликтенээр күндү күтүп жаткандыгыбызды да билдире кетели.

Айгүл Бакеева









Яндекс.Метрика