mainkaptal

Пользовательский поиск
Кыргыз гезиттер
Келдибеков "оюн" кылып, Мадумаровду аксатууда...
Марк Твендин "прессадагы сен жөнүндөгү некрологдон башка ар бир сөз, атүгүл эң жаман сөз да бул - реклама" деген даанышман кеби бар. Ансыңарындай, Ахматбек Келдибеков саясаттагы жүрүш-турушу менен кыйла сөздү артынан ээрчитүүдө. Аз күн мурда эле "Азаттыкка" маек берип, "Үчилтиктин" ынтымагы бекем экенин, президенттик шайлоого карай биримдиктүү күч катары аттанышарын кайталаган. Көп өтпөй Камчыбек Ташиев экөө кайрадан Адахан Мадумаровго айтпастан "Акшумкар" партиясынын съездине катышып, Темир Сариевди мактоо менен кошулууга алгачкы кадамдарын таштап коюшту.

Мындай көрүнүштөн соң Мадумаровдун итатайы дагы тутулуп, булардын улам-улам ойнотконуна, алдап атканына ызырынып, тиштенип отурат. Келдибековдун мындай "саясый ходдорунан" улам ойлойт экенсиң, "бул атайын эле Мадумаров менен биригүү мунасасына барганы, аны ыңгайы келгенде ара жолго таштап кетүүгө башында эле кызыкдар болгонбу?" деп. Себеби, "түштүк картасы" боюнча экөө бири-бирине атаандаш катары сыпатталат. Мындайда койнуңа жылмаңдай кирип келип, байкатпастан "бычак уруп" кеткендей образдын жаралганы кандай?..
Ахмат мырза табиятынан куу жигит, президенттик шайлоого талапкер катары каттала албасын башында эле билген (соттолуп калганы боюнча), бирок болбой эле жүткүнүп, өзүнө пиар жасоо жагынан упай алууну көздөгөн. Саясый соодага баруу үчүн жөн жатпай ары-бери урунуп, коомчулуктун көңүл борборунда туруш керек да. Натыйжада, Мадумаровдун шансы аз экенин байкады да, дароо Сариевге ставка жасап, ага кошулуу үчүн кам көргөндөй. Эгерде Темике президент болуп калса, премьер-министрликти алуу боюнча соодалашат. Болбосо кийинки парламенттик шайлоодо "Акшумкар" менен "Ата Журттун" тандемин жаратууга ашыгат. Эмнеси болсо да Келдибеков өкмөт башына келүүнү самоодо, себеби, жаңы Конституция боюнча премьердин ыйгарым укуктары кеңейтилген. Кыскасы, көчөдө калбоонун амалын издеген убагы. Ошого катар ал түштүктөгү негизги атаандашы Мадумаровду да алсыратып кетүүнү биринчи планга коюп, түркүн түстүү "оюндары" менен чаргытууда. Бирок, элдин көзү көрөгөч эмеспи. Коомчулук деле соңку убакта Келдибековдун "өспүрүм баладай кыялына" тоюп бүтүштү. Чоң саясатта ар бир кадамыңды талдап, туруктуу позицияда жүрсөң бааланасың. Тескерисинче, улам бир жээкке секирип, аныгында актана берсең эч ким олуттуу көз караш менен карабай калат да.
Сакен Бөрүбаев





Урмат САМАЕВ, "Кыргызстан" фракциясынан ЖК депутаты:
"Токмокто контрабанда менен иш кылган эмесмин, бирок, тааныштарым бар..."

Чүйдүн тыңчыкма жаштарынын бири, "Чемпион" каймана аты бар эл өкүлүн интервьюга тартып, азыноолак ой бөлүштүк. Эске сала кетсек, Конституциянын өзгөрүшүнө каршы эң алгачкылардан добуш берген дал ушул маектешибиз болчу.

- Урмат мырза, экс-фракция лидериңиз Канат Исаев өзүнө карата катар-катар кылмыш иши ачылганы саясатта дымы чыкпай кетти да. Анан калса фракциядагы депутаттар менен да жолугушпай, четтеп жүргөнү кандай? Сиз парламентке "Кыргызстан" фракциясы, анын ичинен токмоктук катары Исаевдин арты менен келгениңиз сөз болуп жүрөт. Мындай жааттагы суроолорго кандай жообуңуз бар?
- Канат Кедейканович фракциянын депутаттары менен ар дайым жолугуп турат. Баардыгы менен мамилеси жакшы. Катар-катар кылмыш иши боюнча, эми аны убакыт тастыктайт. Туура, менин депутат болушума Канат Кедейкановичтин салымы, аракети көп болгон. Аны жашырганда не?
- Азыр парламентте сиздердин фракциянын айрым депутаттарына караганда кийинки тизмеде депутаттык мандатты күтүп турган, шайлоодо добушту көп алган талапкерлерге мандат ыйгаруу, алдыга жылдыруу өнөктүгү качан болчудай? Сизге карата да "кетет" деген сөздөр бар го?
- Кудай буюрса, жакын аранын ичинде ушул өңдүү суроолоруңардын баарын фракциянын төрагасына бериңиз. Меники боюнча да алар чечет.
- Бүгүн сиз үчүн партияда лидер ким? Канат Исаевби, Алмаз Баатырбековбу же көмүскөдөгү кожоюн Шаршенбек Абдыкеримовбу?
- Фракциябызда Алмаз Баатырбековду лидер катары шайлаганбыз 17 добуш менен...
- Парламенттен кичи мекениңиз Токмоктун көйгөйлөрү боюнча ооз ачканыңыз байкалбайт го?
- Чүй-Токмок боюнча көйгөйлөрдү көтөрүп эле келгенбиз. Келечекте Кыргызстан боюнча дагы көтөрөбүз.
- Сиз депутаттыкка чейин Токмоктон спортсмен катары артыңызга "чоң муштумдардан" команда түзүп, Кыргызстан менен Казакстандын ортосундагы контрабанданы көзөмөлгө алчу белеңиз? Сиздин бул жааттагы "ишиңизди" Токмок ШИИББ башчысы Максат Чойбеков билип калып, тартипке чакырып, "демиңизди суутуп" койду беле, бир тойдон кармап алып...
- Эч кандай контрабанда менен иш кылган эмесмин, бирок, тааныштарым бар... Ал эми Токмоктун милиция башчысы Максат Чойбеков менен жакшы эле мамилем бар болчу. Экөөбүздүн ортобуздагы мамиле азыр деле жакшы. Ал эми спортсмендерден андай деле команда түзгөн эмесмин. Ага-инилерим бар...
Калыгул БЕЙШЕКЕЕВ





Сооронбай
Жээнбековдун талапкерлигин Путин менен Медведев жактырдыбы?

Президент Атамбаевдин Москвага болгон иш сапары жемиштүү башталганын алгачкы эле күндөрдөн байкасак болот. Маселен, Путин өзү жөнүндө тартылган кинонун премьерасына баруудан баш тартып, кыргыз лидери менен кечки тамактанууга отурганы - эки өлкөнүн жылуу алакасы үчүн болууда. Албетте, бул жааттан майда баратына чейин тиешелүү ММКлар сайрашса керек. А биз ток этерине келели.





Беш күндүк сапардын ийгиликтүү башталганы - Путин менен Медведев биздин Атамбаевдин өтүнүчүн эске алышарынан кабар берет. Азырынча коомчулукка ачык айтылбаса да, президенттик шайлоого КСДПдан талапкер Сооронбай Жээнбековду Россиянын жетекчилери колдой турганы, бул жаатта бир пикирге келишкени бизге маалымдалды. Бүгүнкү бийликтин саясатын улантуучу катары КР өкмөт башчысынын жактырылышы - мамлекеттин туруктуулугуна жана өнүгүүсүнө болгон кыйшаюусуз кадам катары бааланат. Албетте, мындай саясый жемиштин жаратуучусу катары Алмазбек Шаршенович экенинде талаш жок. Эң башкы стратегиялык өнөктөшүбүз Россия державасы Кыргызстандагы кырдаалга, шайлоо процессине кайдыгер карабай, жардам көрсөтүүгө кол сунганы жакшы жөрөлгө.
Аныгында, Сооронбай Жээнбеков үчүн натыйжалуу жол ачылды. Эми эл үчүн ак ниет, таза ишмердигин уланта берсе, трайбализмден жогору турса, туугандарын мамлекеттик бийликке кийлигишүүсүнө кескин түрдө бөгөт койсо, ишенимди толук актайт. Биз да бул жагынан баам салып турмакчыбыз. О.э. калың эл да ар бир кыймылын карап турат.
Арстан АЛГЫРБЕКОВ





Яндекс.Метрика