Кыргыз гезиттер

п»ї
"Шайлоого жалаң бандиттер, куралчан топтор катышты"
18-августта Ош облусунун Кара-Суу районуна караштуу Кара-Суу шаарынын тургундары калаа депутаттарын шайлашты. Тилекке каршы, саясый өнөктүк маалында Кыргызстандын социал-демократиялык (КСДП) жана "Өнүгүү" партияларынын тарапкерлери жердештерине саясый күрөштүн бийик үлгүсүн көрсөтүүнүн ордуна, тескерисинче, эл көзүнчө кырчылдашып, бири экинчисин токмоктоп, а түгүл ок атканга дагы үлгүрүштү.
-Биз көзөмөлдөгөн №5266-шайлоо чөлкөмүнө саат 13.20 чамасында 30-40 чакты спортсмен балдар киришти,-дейт "Ата Мекен" партиясынын Ош облустук бөлүмүнүн төрагасы Абдимиталип Сатыбалдиев, -Ошол жердегилердин айтымында, булар "Өнүгүү" партиясынын жигиттери экен. Аңгыча ал аймактагы КСДПнын жоон топ балдары дагы чогулуп, бир маалда эки тарап болуп мушташа кетишти. Анан ара чолодо атылган октордун үндөрү айланабызда далайга жаңырып жатты. Эки тарап андан ары элден алыстап, өз ара кырчылдаша салгылаша кетишти өңдөнөт, бир маалда таптакыр эле тынчып калышты.
Капысынан кепке аралашкан №5266-шайлоо чөлкөмүнүн төрагасы Нуриддин Исманов буларды айтып берди:
-Бир маалда биздин корообузда жаш балдар мушташып жатканын көзүм чалды. Анан артынан кадимкидей атышуу угулду. Мен коркуп кетип, дароо милиция чакырдым. Алар дароо жетип келишип, жаңжалды ырбатпай басканга үлгүрүштү.
Эки партиянын тарапкерлеринин өз ара араздашуусунан улам, мушташкандардын үчөө катуу запкы жегендиги айтылууда. Жабырлангандардын экөөсү Кара-Суу аймактык ооруканасына жеткирилген.
-Бизге азырынча экөө гана кайрылды. Мунарбек Райымбеков 1988-жылы туулган. Ал бөйрөгүнө эки-үч жолу бычак жептир,-деди Кара-Суу аймактык ооруканасынын башкы дарыгери Каныбек Муратов, -Ошондуктан, Мунарбекке дароо операция жасалып, учурда бул жигит реанимацияда жатат. Эми гана кичине эсине келди. Акыбалы алгачкысынан кыйла эле дурус. Ал эми Исламбек Каримов 1983-жылы туулган. Ал дарыгерлерге "колума ок тийди" деп өзү айтыптыр. Оң жак колунан жараланган экен, ошону үчүн ал жараатын доктурлар дароо таңып беришиптир. Ооруканага жатмак эле, суранып атып үйүнө кетиптир. Эми доктурга кайрылса, дароо эле жаткырабыз.
Запкы жеген Мунарбек Райымбеков социал-демократиялык, Исламбек Каримов "Мекен ынтымагы" партиясынан экен. Ал эми "көкүрөктөн ок жеди" деген Нурмухаммед аттуу үчүнчү жигит (фамилиясы азырынча белгисиз) "Өнүгүү" партиясынын мүчөсү болгон. Анын акыбалы туурасында азырынча так маалымат
жок.
Күбөлөрдүн айтымында, окту адегенде СДПКнын өкүлү атыптыр. Муну ИИМдин маалымат катчысы Ж.Абдрахманов ММКларга билдирүүсүндө дагы бышыктады.
Ал эми "Өнүгүү" партиясынын аймактагы өкүлү Тыныч Мамаев өз ара араздашуу маалында партиялашын СДПКнын өкүлү бычактап салгандыгын караманча четке какты. Бул арада "Кыргыз Ата" элдик партиясынын төрагасы Т.Келдибаев Кара-Суу шаарындагы шайлоо орой мыйзам бузуулар менен коштолгондугун, ошону үчүн анын жыйынтыгын таптакыр тааныбай турушкандыгын жар салды.
-Кыргызстандын тарыхында эзели мындай ыплас шайлоо болгон эмес! Бул саясый өнөктүккө эл эмес, жалаң бандиттер, анан куралчан топтор катышты. Андыктан, Кыргыз бийлиги "чыныгы адилеттикти орнотом" десе, Кара-Суу шаардык кеңешинин шайлоосунун жыйынтыгын күтпөстөн эле аны жокко чыгарып, токтоосуз кайра шайлоо дайындоосу абзел!-дейт Төлөгөн Келдибаев.

Алишер ТОКСОНБАЕВ,
өз кабарчыбыз, Кара-Суу шаары














??.??