Эркиндигин эми толук алып, акталып, эмгегин элине арнамакчы болгон Эркин мырзанын энергиясы күч. "Финполдун ишканасында күндөп-түндөп жатсам да иштейм" дегени кандай эрдик. Саясаттын камчысынын уусун жакшы эле тартты. Бир күндө баарын таап , бир күндө баарын жоготуп алган күндөрдү баштан кечирди окшойт. Турмуштун да, саясаттын да запкысын көп тарткан адамдар ак дилден мамлекетине иштеп берет деген ишеним, үрөн салып тургансыйт. Кеп ал кишинин оппозицияда жүргөн эмгегинин аркасында кызматка келгени эмес, иштин көзүн билгенинде. Кыргыз паспортундагы коррупцияны, банк рейдерлигин, Петровка окуясынын жүзүн ачканын бүгүн айтып коюш керек.
Ырыскелди Момбеков
Маданият агенттигинин башчысы жакынкы аралыкта агенттиктин кадр алмаштыруу саясатын баштабай тургандыгын билдирди. Чыгармачыл чөлкөмгө бир топ реформаларды жасоо багытында иш процесстерин баштап жатыптыр. "Убактылуу өкмөт өз ишинин жыйынтыгын алты ай аралыгында көрсөтүп , эл ишенимин акташыбыз керек" дейт агенттиктин башчысы. Ибрагим Жунусовдун реформалары эмне болот болду экен.
Равшан Жээнбеков
Равшан мырза кайсы кызматка барат деп коомчулук кулак түрүп жаткан кези. Ылайыктуу кызматтар четинен кыя чабылып кетип жатат. Кыргызда айтмакчы сыйлуу устукандар табак менен тартылып кетти. Бирок, негедир Равшан мырза кызматка шашылбагандай, убактылуу өкмөттөн өзүн оолак алгандай. Неге деп баш катыруудабыз. Маалыматыбызга караганда жакынкы күндөрү Таластын куттуу жеринде Манастын күмбөзүнүн алдында түмөн эл менен жолугушат экен. Ушул тапта бобордо элдер менен баарлашып, абалды карапайым элдин катмарынан угуп, талдап жаткан кези.
Бөдөш Мамырова
Биз билген да, билбеген да Бөдөш эже деген таризде маек алып, гезит бетине жайгаштырып жатсак, Миграция жана калкты ишке жайгаштыруу министирлигине дайындалып калды. 10 жылдан бери саясаттын самын көбүгүндө эзилип, ар-намысынан тайбаган эжекебиздин эмгеги бааланганына ичибиз жылыды. Миграциянын жүгүн Мамырова да Рыскуловадан кем калышпай алып кетээрине көз жетет.
"Айгай"
Кайрадан "Айгай" гезити жарыкка чыкты. Президенттик шайлоодон кийин жабылып, гезит таймаштан кеткен эле. Эми кайрадан кан жүгүртүп иштемей болду. Башкы редакторлуктун эки тизгин бир чылбырын Кенжебек Арыкбаев алды. Ошентип гезиттер да ойгонушту.
Улан Сарбанов
Сарбановдун сары изине түшө турган болсо, сагызгандын уясындагыдай эле балекет басмандар чыкчудай. Акаевге чапкан финансы кетмени, Максимдин чөнтөгү, айтор акчалардын аралында жүргөн машыккан финансист. Банк сферасында бул мырзаны бир жаныбарга салыштырабыз бирок, айткыбыз келбейт. Ата-бейитке барып көлөкө көрсөтүп, очкисинин артында күлүп турганы эмнени каңкуулайт. Садыркуловдун 500 миң доллары, сүрөтчүнүн афёрасы, Максимдин финансы операцияларынын айланасында Сарбановдун казандын көөсүндөй болгон иштери бар. Укмуштуу фактылар чыгып жатат. Т.Сариевди да Сарбанов сызга олтургузуп кетпесе болду деген кооптонуулар болууда. Сарбановдун сериалдарын кийинки санда окуйсуздар.
Сайт жөнүндө: ► Бул айылда негизинен кыргыз гезиттери электрондук тиркеме түрүндө жарыяланат. ►Архивге, емейлге жана редакцияга шилтемелер
ошол гезиттин башбарагында берилген. ► Жеке макала жарыялоого буйрутмалар кабыл алынат.
Сведения о сайте: ► На сайте публикуются в основном кыргызскоязычные газеты
в виде электронных подшивок данных газет. ► Ссылки на архивы, емейл и данные о редакции указаны на главной странице конкретной газеты. ►Принимаются заказы на публикацию частных статей.
