Алматада кыргызстандык жана өзбекстандык 17 кыз сексуалдык кулчулуктан бошотулду
"Алматада 17 кыз сексуалдык кулчулуктан бошотулду",- деп кабарлайт "Kazakhstan Today" Алмата областынын ички иштер департаментинин уюшкан кылмыштуулукка каршы күрөшүү боюнча башкармалыктын булагынын берген маалыматына таянып.
"Алтын Орда" базарынын жанында жайгашкан "Жибек Жолы" мейманканасында Алмата областык ИИДнын уюшкан кылмыштуулукка каршы күрөшүү боюнча башкармалыгынын кызматкерлери тарабынан сойкулук менен алектендирген притон табылды. Ал жерден 17 кыз бошотулду",- деп кабарлайт булак.
Ал аталган мейманкана Тажикстанды Казакстандын Тараз, Алмата, Шымкент, Кызылордо шаарлары менен байланыштырып турган трафиктин байланыштыруучу звеносу экендигин да белгиледи. Мындан тышкары мейманканадан кыргызстандык жана өзбекстандык кыздар куткарылган.
Бул каналды уюштурду деп Каз акстандын 38, 29 жана 19 жаштардагы атуулдары шектелүүдө.

Чочко тумоосун жуктуруп, айыккандар бар
Кыргызстанда бүгүн 41 киши чочко тумоосуна кабылды. Экөө Ошто, бирөө Таш-Көмүрдө, бирөө Ысык-Көл облусунун Ак-Суу районунда, калгандары Бишкекте. 41 кишинин экөө жаш балдар. Илдетке кабылгандардын көпчүлүгү сырттан кайтып келген мигранттар, ошондой эле аба аркылуу жуктургандар да бар. 13-ноябрь күнү Ош шаарында 5 жашар кыз чочко тумоосуна кабылганы маалымдалган, дем алыш күндөрү Ош шаардык жугуштуу оорулар ооруканасына бул илдетке шектелген дагы бир улан келип түштү, ага карата медициналык иликтөөлөр Кара-Суу шаарындагы вирусологиялык лабараторияда жүргүзүлүүдө.
Кыргызстанда чочко тумоосунун ноябрь айында башталган. 2-ноябрда Орусиядан келген поездден чочко тумоосун жуктурган 7 киши ооруканага жаткырылган. 5-ноябрь түнү келген Новокузнецк-Бишкек каттамындагы поездден дагы эки киши бул оору менен ооруганы аныкталган. Бул аралыкта коркунучтуу илдет аба аркылуу да жуга башталганы белгилүү болгон. Август айынан бери Кыргызстанда чочко тумоосун жуктурган 44 киши катталды. Алардын көпчүлүгү дарылоолордон кийин айыгып кетишти. КР саламаттыкты сактоо министрлигинин суроосу менен бүткүл дүйнөлүк саламаттыкты сактоо уюму тарабынан берилүүчү 40 миң кишини дарылай турган дары-дармектер ноябрь айынын аягында келип түшөрү күтүлүүдө. Ал эми декабрда пандемиялык гриппке каршы вакциналар келет деп күтүлөөдө.

"Дордой-чемпион"
Нарындын "Дордой-Динамо" футбол командасы футбол боюнча Кыргызстандын чемпиону болду.
Кечээ "Спартак" стадионунда нарындык "Дордой-Динамо" жана Кант шаарынын "Абдыш-Ата" командаларынын ортосунда "алтын матч" үчүн таймаш болуп, оюн дордойчулардын эсебине 3:2 менен аяктады.
Эске салсак, КРнын чемпионатынын жыйынтыгы менен "Дордой" жана "Абдыш-Ата" командалары 11 деген бирдей очко алышкан. Буга байланыштуу жеңүүчүлөрдү аныктоо үчүн "алтын матч" өткөрүлдү.


Чындыкты мактанган ден соолукка пайда
Ибрагим Жунусов Кожоназарович,
ЖК депутаты:
Туулган жылы: 1961-жыл, 13-май
Кичи мекени: Кара Суу району, Сарай айылы
Алгачкы кесиби: пахта заводдо жумушчу, көчө шыпыргыч
Сыйлыгы: КР эл артисти, эл агартуунун отличниги, маданияттын мыкты кызматкери, СССР ардак громатасы, пофессор, педагогика илиминин кандидаты
Ышкысы: машина айдоо
Баалаган саясатчысы: В. Путин
Суктанган өлкөсү: Кыргызстан
Кыргызстандын келечегине божомолу: Келечекте орто Азияда өзүнүн аталык ордун аткарган, келечеги кең, эң сонун өлкөлөрдүн катарына кирет
Арданганы: Жаштардын чет мамлекеттерде эмгек мигранты болуп жүргөнү
Кубанганы: Кыргыз элинин бүтүндүгү
Ишенгени: Кудай Таала
Кыялданганы: Элибиздин амандыгы жана тынчтыгы
Динге көз карашы: Ислам динин колдойт, башка динге каршы
Адабий ынтаасы: Ч. Айтматов, Т. Касымбеков жана К. Молдокасымовдун китептерин өзгөчө баалайт
Спортко шыгы: эркин күрөш
Жактырган учкул сөзү: "Чындыкты мактанган ден соолукка пайда"
Жашоодо көздөгөн максаты: Калктын тынч, бакубат жашоодо өмүр сүрүүсү
Өзүнө жакпаган сапаты: эмоцияга тез алдыргандыгы
Кетирген катасы: бир нече
Кыргызстанга кайсы башкаруу формасы ылайык: президенттик-парламенттик башкаруу
Жактырган ичимдиги: Ажике жайлоосунун кымызы
Жаныбары: Уй
Жан досу: А. Мадумаров
Душманы: "Душман сырттан жылмаят, ичинен кубанат" демекчи касташкандар көп
Жактырып уккан ыры: Рыспай Абдыкадыровдун ырлары
Үйбүлөсү: жубайы-Чынара, кыздары Асель, Алина, уулу Эламан

Тамеки ден соолукка зыян!
ЖКда депутаттар ММК беттеринде (радио, теле, гезит ж.б.) тамекини рекламолоого тыюу салган мыйзамды кош колдоп колдошту. Эми мындан нары адам ден соолугуна тескери таасир эткен тамекинин түркүн түсү, көңүлдү айнытып, көздү кычыштырып, рекламаланбайт. Албетте, тамеки чыгарган ишканалар иштей берсе болот, бирок ММКны колдоно алышпайт. Болбосо рекламанын таасири менен тамеки азгырыгына белчесинен баткан жаштар толтура. Анча болду аракты да рекламалаганды токтотсок кыргызга жакшы эле болмок.


"Белгисиз маршруттун"
кезектеги маршруту Эстонияда
Кинорежиссер Темир Бирназаровдун "Белгисиз маршрут" тасмасы Таллинде өтчү "Караңгы түндөр" кинофестивалына чакыруу алды. Фестивалда 40ка жакын кинотасма көрсөтүлөт. Анда негизги басым коңшу өлкөлөрдөгү жана кино тармагы жакшы өнүгө элек өлкөлөрдөгү жаңылычылыгы бар тасмаларга жасалат. Кинофестиваль Таллинде 30-ноябрдан 3-декабрга чейин өтмөкчү.


"Бештентек" безге саят
Коомчулукту коррупцияга кайдыгерлигин азайтуу, коррупция менен күрөштү күчөтүү жана коррупциянын зыян жактарын жайылтуу максатында Кыргызстандагы медиаөкүл институту "Бештентек" долбоорун ишке киргизди. "Бештентек" долбоор алкагында Кыргызстандын мектептеринде класстан тышкаркы окуулар өтүп, айылдарда куурчак театрынын оюну көргөзүлүп, "Бештентек" үналгыда жаңырып, жаңы жылдан тарта УТРК аркылуу 10 мультфильм көрсөтүлмөкчү. Коррупция менен күрөшүүнү күчөтпөсөк, ансыз деле коррупция өркүндөгөн 180 өлкөнүн арасында Кыргызстан 160-орунду ээлеп турат.