Кыргыз гезиттер

п»ї
Каптын дагы бир жеринен шибеге тешип чыкты

Баткен районунун Ак-Сай айылынын Тажикстандын Ворух анклавы менен чектешкен аймагында 27-28-апрелде кыргыз-тажик жаңжалы тутанды. Расмий бийликтин канчалык жаап-жашырып, ыйынып-ычкынып "Баары жайында! Абал көзөмөлдө!" деп кыйкырганына карабай, бул жолу да бышып жетилген жара дагы бир жеринен чарт жарылды. Бийлигибиз болсо бири-бирине чалынып, өрттү өчүргөнгө далбастады. Тилекке каршы, дагы деле өрттүн алдын алаар эч ким жоктой…

Коңшулардын кезектеги чабуулу
27-апрелде түшкө жуук Ак-Сай, Самаркандек айыл округдарынын жашоочуларынын Кишемиш, Геревшин, Тамдык жайлоолоруна баруучу Ворух анклавын айланып өтүүчү көз карандысыз Ак-Сай-Тамдык автожолун салып жаткан куруучуларды Тажикстандын 100 чамалуу жарандары топтолуп келип, чек арадагы такталбаган аймакта курулуш иштерин жүргүзүп жатканын, кыргыз тараптын бул аракеттерин эл аралык келишимдерди одоно бузгандык катары эсептеп, чыр чыгарышкан. Кайым айтышуу бат эле колу-буттарды ишке киргизип, көптүккө салган тажиктер Кыргызстандын 5 жаранын сабап, натыйжада, бир трактористтин колун сындырып, башка тракторист менен айыл башчысынын башын жарып, айыл молдосу менен аксакалын сабап салышкан. Курулушчулардын техникалары таш бараңга кабылып, талкаланган.
Коңшулардын чектен чыккан зөөкүрлүгүн угуп кыжырданган кыргыз тарап тездик менен чогулуп Ак-Сайдын Ворух тараптагы чек арасына топтолушкан. Ал учурга карай тажик жарандары да чек ара тилкесинде топтолушуп, алардын саны өсүп бараткан экен. Бат эле кыргыз тараптан 500 чамалуу, тажик тараптан 4000 чамалуу адамдар чогулуп калышкан. Тараптардын тирешүүсү келишкис агрессияга айланып баратканда ортодо турган чек арачылар эки тараптын кагылышуусун болтурбоо максатында асманга эскертүүчу ок атууга мажбур болгон.
Тажиктердин агрессивдүү жоруктарына жооп кылып, кыргыздар Ворух анклавын Тажикстандын негизги аймагы менен байланыштыруучу автожолду тосуп салышкан. Өз кезегинде тажиктер да Ак-Сай айылын эки тарабынан - Ворух жана Кожо-Аъло айылдарынан жолду бууп, Ак-Сайды курчап алышкан. Көптүккө салган тажиктер Кыргызстандын Жийде, Көк-Таш, Жалгыз-Өрүк айылдарын каптап кирип, там-таштарын талкалап, өрттөп, жашоочуларын уруп-сабап, малдарын айдап кетишкен.
Кыргыз бийлиги жыл башындагы Чарбак окуясынан кийин чек араларды бекемдөөгө жана чек ара аймагындагы айылдардын инфраструктурасын чыңдоого жалпысынан 371 млн. сом бөлгөн. Анын ичинен 30 млн. сому жогорудагы 27 километрдик Ак-Сай-Тамдык айланма жолун курууга каралган. Кыргызстандын расмий бийлигинин маалыматы боюнча, тажик тарапка 5-апрелде чек ара аймагындагы Ак-Сай-Тамдык айланма унаа жолун куруу жөнүндө расмий билдирүүсү берилген. Жол куруу иштери 10-апрелде башталган, Жол Кыргызстан менен Тажикстандын болжолдуу чек арасынан 500 метр ичкери тарапта салынган.
Бирок, таң калыштуусу, облус башчысы Жеңиш Разаков өзү моюнуна алгандай, Баткен облусунун жетекчилигинин аталган жол куруу иштери, долбоору жана башка техникалык маселелери тууралуу жеткиликтүү маалыматы болгон эмес. Мынча болуп, чыр чыкпаганда жол бүтүп, лента кесүүгө барганда гана кайдан-жайдандыр жол салынып калганын билмектир.

(Уландысы 2-бетте)













??.??