кыргыз тилиндеги гезит "Алиби"

п»ї

"Мародерлукка шектүүлөрдүн
тагдырын парламент чечет"
Бүгүн талап-тоноочулукка "Ата Мекен" партиясынын кээ бир депутаттарынын (Ө.Текебаев, Б.Шер, Т.Мадылбеков, Р.Төлөгөнов) тиешеси барбы, жокпу деген суроого чекит коюлат. Тагыраагы, бул маселе боюнча парламенттик убактылуу комиссиянын жыйынтыгы парламентте угулат. Алдын-ала комиссиянын төрагасы, "Ата Журт" фракциясынын депутаты К.Осмонов менен баарлаштык.

- - Курманбек мырза, талап-тоноочулук боюнча териштирүүнү комиссия аябай эле кечеңдеттиңиздер. Кечигүүгө эмне себеп болду?
- - Коомчулукка белгилүү болгондой, былтыр, 6-сентябрда, талап-тоноочулукту иликтөө боюнча парламенттик убактылуу комиссия түзүлгөн. Ишибизди 13-сентябрдан баштап, ноябрда аяктап, бир нече жолу күн тартибине киргизүүгө аракет кылганбыз, тилекке каршы кирбеди. Же комиссиянын ишин узартуу боюнча маселе койгонбуз, ал дагы чечилген жок. Анан мен төрага А.Жээнбековго расмий кат жазып, бардык топтолгон материалдарды тиркеп, 29-ноябрда киргизгенмин. Төрага "декабрда каралат" деген, каралган жок. "Январдын башында" деген, андан да жылып, "16-январда" деген, тилекке каршы, андан да ары жылып кетти. Кыскасы, "андан да маанилүү маселелер бар. Бюджет маселеси, ЖКнын алдында отчет берчү органдардын отчеттору чыгып калды" деп жылдырылып келди.
- - СДПК бул маселени алдын ала жабык эшик артында сиздин катышууңуз менен караганы маалым. Жабык эшик артында "макулдашуулар" болору жашыруун деле эмес да. Корутундуга кандай оңдоо, түздөөлөр киргизилди?
- - Корутунду эч кандай өзгөртүүгө дуушар болгон жок. Бул ишке башынан баштап коомдук уюмдар, ММКлар тыгыз катышкандыгына байланыштуу мурда гезиттерге (силердин дагы гезитке) чыккан. Ал эми өткөн жумада СДПК фракциясынын жыйынында бул маселе каралганы ырас. Мен аларга "Корутундуга кол койгон 5 депутатты, мурдагы ИИМ министри Зарылбек Рысалиевди жана Убактылуу тергөө абагынын (СИЗОнун) начальнигин чакырып, сурагыла" деп сунуштадым эле, бирок, эмнегедир комиссиянын төрагасы катары мени гана чакырыптыр. Ал эми "Ата Мекен" фракциясынан бардыгы катышты. Комиссиянын жыйынтыктоо материалдарына алымча-кошумчаны мен кийридим. "Экөөнүн кыйыр тиешеси бар" жана "Экөөнүн түздөн түз тиешеси бар" деген жери бар. Ушул эки момент боюнча өзүмдүн ой-пикиримди жаздым. "Кыйыр тиешеси бар" деген жерде - "Ата Мекен" партиясынын депутаттары Абдулла Юсупов менен 2005-жылдан бери туруктуу байланышы бар" деп жазылып жүрөт. Ал боюнча мен: "Ө.Текебаевдин, Б.Шердин, Т. Мадылбековдун 2005-жылдан бери туруктуу байланышы болгон эмес" деп. Экинчисинде "Ата Мекен" фракциясынын офисинде мародерлукка чейин бир гана жолугушуусу булардын мародерлукка кыйыр да, түз да мааниде негиз боло албайт" деп. Андан тышкары, "Асылбек Текебаев 2010-жылдын май айында Бакиевдердин үйүн өрттөөгө катышкан" деген нерсени факты катары кабыл албашыбыз керек, бул боюнча кошумча тергөө талап кылынат" деген пикиримди айттым. Калганына, мен дагы башка мүчөлөрдөй эле макулмун. Бул боюнча жыйынтык кандай чыгарылып, кандай чечим кабыл алат - ал парламенттин иши.
- - Райкан Төлөгөновдун телефон менен сүйлөшүүсү тастыкталды да?
- - Ооба.
- - Мурдагы ИИМ министри Зарылбек Рысалиевдин маалыматы туура чыктыбы?
- - Ооба.
- - Бешөө кол коюп, бешөө кол койбой койгон турбайбы. Кимдер кол койбой койду. Эмнеге?
- - Мен, Надира Нарматова ("Ата Журт), Заирбек Жоошбеков, Бахтияр Кадыров (СДПК), Кенжебек Бокоев, Абдыжапар Бегматов (Республика), Бактыбек Калмаматов, Наталья Никитенко (Ата Мекен), Анвар Артыков, Кожобек Рыспаев (Ар-намыс) бекитилгенбиз. Кол койгондор - мен, Н.Нарматова, А.Артыков, А.Бегматов, К.Бокоев. Эмнеге кол койбогонун өздөрүнөн сурасаңыздар болот.
Маектешкен
Назира СААЛИЕВА

P.S. Бул маселе боюнча ой-пикирлерди эмки сандан кенен окуй аласыздар.












??.??