кыргыз тилиндеги гезит "Айкын Саясат"

Көөлөгөн сайын Бабанов агарып турдубу?
Экс-баш прокурор Кубатбек Байболовдун парламентте сүйлөгөн сөзүнө караганда, Өмүрбек Бабанов кызмат абалынан кыянаттык менен пайдаланып, өлкө казынасына 730 млн. сом өлчөмүндө салык төлөбөй жүрүптүр. Парламенттик комиссиянын жыйынына келген Кубатбек мырза муну "Манас Интернейшнл Сервис" ("МИС") ЖЧКсына байланыштырат. Бул маселени иликтей келгенде, аталган ишкана 2000-жылдын 22-ноябрында "Бишкек эркин экономикалык аймагынын" генералдык дирекциясында катталгандыгы ачыкталды. "МИС" 2006-жылы 11-апрелде кайрадан каттоодон өтүп, Рустам Махмуджанович Касымов аттуу Россиянын жараны компаниянын ээси болгон. Арадан жыл айланбай, "Манас Интернейшнл Сервис" жоюлган. Бирок, мамлекет астында эч кандай карызы болгон эмес. Анын үстүнө, "МИСте" тиешеси жоктугун, ишкананын ички турмушуна болгону өнөктөштөрү аралашканын 1-вице-премьер өзү билдирген.
Мурдагы режим тушунда бул ишканага бийлик тарабынан кысым көрсөтүлгөн. Тактап айтканда, 730 млн. сомду "Манас Интернейшнл Сервистин" мойнуна илүүгө аракет жасашкан. Жыйынтыгында бир нече ирет соттук териштирүүлөр орун алып, бирок, анын бири дагы тастыкталбаптыр.
Көрүнүп тургандай, Өмүрбек мырза өнөктөштөрүнө жардам бербей, алар эч кимдин колдоосун албай иштешкен. Ошого жараша эч кандай мыйзам бузбай, мыйзам чегинде гана иш алып барышканы аныкталган кези. Муну комментарийлеп, ашыкча шөкөттөштүн деле кажети жоктур…
Мындан сырткары, депутаттык комиссия жеке ишкер Валерий Хондун сабалышына Ө.Бабанов менен анын жээни Жаныбек Сагадылда уулунун катыштыгы жоктугун, бизнесменди К.А.Сыдыков аттуу жаран сабап, ал Бишкек Ички иштер башкармалыгы тарабынан сот жообуна тартылып жаткандыгын кабарлайт. Ошондой эле 1-вице-премьердин орус инвесторлорунан ("Мегаком" өкүлдөрүнөн) 50 млн. доллар сураганы жалган болуп чыкканын, Өмүрбек мырза апрель окуясынан бери карай Белоруссияга эгерим каттабагандыгын, эч качан Казакстан жарандыгын албагандыгын, бул тууралуу Жогорку сот 2007-жылы токтом кабыл алганын комиссия кошумчалайт. Ошентип Өмүрбек Бабанов эки күн мурда кайрадан өз кызматына киришти. Буга чейин "Бабанов Америкада качып жүрөт" деген ушактар да тарап кеткен эле.


  Кыңыр иш кырк жылда...

Атамбаев "апапакай" атаган, Келдибеков коргогон Кулматов куугунтук табабы?
Мамлекеттик Бажы кызматынын башчысы Кубанычбек Кулматовдун орусиялык атуулдугу, жыл бою жеке өзүнө 600 миң сом өлчөмүндө жазган сыйлыктары, айына эки жолку Москвага жасачу иш сапары (албетте, мамлекеттин эсебинен) тууралуу детективдүү окуя аягына чыкпас болду. Бул чуулгандуу маселе мындан үч ай мурун (25.02.2011) парламент жыйындарынын биринде ЖК депутаты Т. Шайназаров тарабынан көтөрүлгөнү маалым. Ал тууралуу өткөн сандарыбызда жазганбыз. Бүгүн ошол маселе толук ФОМС РФ тарабынана тастыкталып отурат.
Буга чейин бул маселе ММК беттеринде кызуу талкууга алынганы менен К. Кулматов өзү көпкө чейин же ак дебей, же көк дебей келгени менен КР Премьер-министри А. Атамбаевдин кеңешчиси Фарид Ниязов мындай маалымат туура эмес экендигин айтып, танып келгени белгилүү. Ошентсе да калыстык үчүн айтып коюу керек, "Вечерний Бишкек" гезитине (11.03. 2011) берген маегинде, К. Кулматов мырза өзү РФ ФОМСу тарабынан анын атуулдугу тууралуу берилген справка бар экендигин жана бул документ премьер-министр А. Атамбаевге маалымдалгандыгын мойнуна алган. Анын түшүндүрмөсүнө караганда РФнын кызматтык паспортун ошол өлкөнүн компетенттүү органында иштеп жүргөнүндө алгандыгын, бирок жумушу аяктагандан кийин 1997-жылы Бишкекке келгенден кийин 1994-жылкы үлгүдөгү кыргыз паспортун алгандыгын айтат. Кыстара кетчү нерсе, К. Кулматов 2010-жылдын 7-апрелинен кийин А. Атамбаев тарабынан "таза, коррупцияга малынбаган кадр" катары дайындалган эле. Бул туурасында коомчулук А. Атамбаев менен А. Бекназаровдун телефондук сүйлөшүүлөрү делинип Интернет-сайттарга жарыяланган аудио-жазуудан тааныш.
Ошентип, канчалык Кулматов маселесин тындым кылууга аракет кылышканы менен бул маселе ушул жылдын 4-апрелинде экс-башкы прокурордун милдетин аткаруучу К. Байболов тарабынан парламент трибунасынан дагы бир жолу көтөрүлүп, анда Кубат Калбекович К. Кулматовдун Орусия атуулу экендиги тууралуу документтер бар экендигин тастыктаган. Муну 28-апрелде болсо жаңыдан шайланган КР башкы прокурору Аида Салянова парламент жыйынында дагы бир жолу тастыктап, бул туурасындагы документтер КР Президенти Роза Отунбаевага жөнөтүлгөндүгүн белгилеген.
(Уландысы 4-бетте)






Яндекс.Метрика