кыргыз тилиндеги гезит "Айкын Саясат"

2 МИЛЛИОН 700 МИҢ СОМ КАЯКТА?
2010-жылдын 7-апрелинде бүт Кыргызстанда Бакиев бийлиги алмашып жаткан убакта "Электр станциялар" акционердик коомунун кассасынан 2 миллиондой сом, 12 миңдей доллар акча белгисиз жагдайларда жоголуп кеткенине ушул кезге чейин эч ким жооп бере элек. Бишкек шаарынын 1-Май райондук милициясы ишти териштиримиш болуп, жаап койгонуна райондук жана Бишкек шаардык прокуратура көз жуумп койгон. Эсеп палатасынын аудиторлору Бокешов, Итигулов, Кудайбердиев акционердик коомдун ишин текшергенде да бул фактыны эмне үчүн таппай, кыйгап өтүп кеткени белгисиз. Элдин баары Ак үйдө Бакиев бийлигинин аткан окторунан жан сактап жүрсө, коомдун башкы бухгалтери З.Баранова, кассири Н.Каширина шалаакылык кылып, кассанын сейфин эмнеге ачык таштап кеткенине элдин көбү таң. Текшерүү комиссиясынын төрайымы С.Увайдаева бул уурдоону билбей каякта жүрөт? Айтор таң калычтуу көп нерсени эмнегедир ушул убакка чейин эч ким териштирбегени кызык. 2 миллион 700 миң сомдой акчанын "уурдалып" кеткенине "Электр станциялар" ААКсынын которулуп кеткен гендиректору Медетбек Айткулов жооп береби же жаңы директор Аман Тентиев жооп береби? Бул факты, дегеле акционердик коомдо ири суммадагы арам акчаларды адалдоо жолуна Кыргызстандын финансылык чалгындоо кызматынын жетекчиси Гүлмира Шакирова көз салып койсо. Ал эми жоопту Энергетика министри Аскарбек Шадиевден күтсөк.





Үзөңгү-Кууш, Каркыра сыяктуу жер бермейибиз токтобой жатабы?
Жогорку Кеңештин коопсуздук жана коргоо комитети Кыргыз Республикасы менен Тажикстандын ортосундагы 2005-жылы 17-майында кол коюлган эки тараптуу жер тилкелерин берүү боюнча келишимге өзгөртүүлөрдү киргизүүнү колдошкон жок. Бул тууралуу кечээ Жогорку Кеңештин коргоо комитетинин жыйынында ачыкка чыкты. Комитеттин төрагасы Исмаил Исаковдун (КСДП) айтымында бул келишимге өзгөртүүлөрдү киргизүү Кыргызстандын кызыкчылыгына төп келбейт тургандыгын баса белгилеп айтты. Кыргызстан Тажикстанга 90 гектар жер берип, жол салуу үчүн 5 гектар Тажикстандан жер алган экен. Бирок, учурда алынган 5 гектар жол салууга ыңгайсыз болгону үчүн, келишимге өзгөртүү киргизип, мурунку жолдун аймагынан кайрадан жер алууну көздөшүп жатыптыр. Андыктан Исмаил Исаков бул мамлекеттин кызыкчылыгына төп келбестигин, тиешелүү адамдардын жоопкерчилигин кароо зарыл экенин айтты. Бул жагдайларга абай салып турбасак анын артында мурдагы бийликтин тушундагы катачылыктар кайталанып калаарын бир даары эске салат. Дал ушундай жол менен Үзөңгү - Кууш кеткен, Каркыра кеткен, мындан ары мындай жол менен мамлекеттин аймагы башка өлкөлөргө берилишин токтотушубуз керек, бул келишим боюнча бардык керектүү документтерди карап чыгуу зарыл экениндигин да белгилейт Исмаил Исаков.




Атамбаев Бабановго ишенеби?
1-вице-премьер-министр Өмүрбек Бабанов кызматтан убактылуу четтегенден бери коомчулукта түрдүү мүнөздөгү ушактар желдей жортуп жүрү. Айтор, учугу көрүнбөгөн имиш, имиш, имиштер. А реалдуу жашоодо мындай "легендалар" суу кечпеши аштан бышык. Башбакан Алмазбек Атамбаевдин коомдук каналга берген кеңири интервьюсу буга далил.
Премьердин айтымында, Кыргызстандагы эн ири уюлдук компания саналган "Мегакомдун" айланасында көп талаш маселе болгон. Ал чууда Ө.Бабановдун фамилиясы да аталганы маалым. "Бирок, - дейт Алмазбек Шаршенович. - Азырынча Бабановдун тегерегиндеги ызы-чууга байланышкан бир маселе чечилди. Бир жалган жалаа толугу менен жокко чыгарылды". Башбакандын бу кебине жакшылап абай салсак, Өмүрбек мырза "Мегаком-гейт" "операциясынан" жабыркабай таза чыккандыгы ачыкталат. Таза чыкмак түгүл, 1-вице-премьер аталган уюлдук ишканадан өлкө казынасына дивиденд иретинде 860 млн. сом түшүрүүгө үлкөн салым кошконун: "Бул маселеге карата (Мегакомду айтканы) экс-башпрокурор Кубатбек Байболов убагында көп нерсени айткан. Бирок, учурда жашоо нени көрсөттү? Бүгүнкү күндө "Мегакомдон" эки жылдан бери төгүлбөй келаткан каражаттар дивиденд иретинде түштү. Бул 860 млн. сом" деп баса белгилейт.
Көрүнүп тургандай, Өмүрбек Бабановдун актыгына, мамлекеттин кызыкчылыгын жогору коюп, солго агылган миллиондорду бюджетке бурган эрдигин премьер баш болуп жогору баалап атыр. Мунун айкын далили катары кресломдон кол жууп калам деп коркпостон кызматын убактылуу өткөрүп бергенин Атамбаев да өзгөчө кубаттайт. "Ошон үчүн мен ойлойм, комиссия иликтеп аткан маалда Бабанов өз милдетин убактылуу өткөрүп берип абдан туура, жигиттик кадам таштады" дейт ал.
Жаш болсо да "карт бөрү" саясатчыларга үлгү көрсөткөн Өмүрбек мырзанын кыргыз эли үчүн жасай турган иштери али алдыда экени айкын. Мындай ойду премьер дагы бир ирет бекемдейт. Ал киши интервьюнун сонунда: "...Булардын баары тең "Мегаком" окуясындай жалган жалаа, ушак экени тастыкталат. Аз калды, комиссиянын жыйынтыгын күтөбүз. Мен ойлойм, андан кийин Бабанов өз ордуна кайтып келип бизге жардам берет" деп өзүнүн 1-орунбасарына зор ишеним артып жатат.
Минтип өкмөт башчысы чоң ишеним артып, жамы журт кызматка кайтып келүүсүн талап кылып атайын уюм түзүп аткан соң Ө.Бабановдун белин бекем бууп, жаны реформаларды баштап, кыргыз эли жана Кыргызстан мамлекети үчүн эмгектенүүдөн бөлөк аргасы жок.





Яндекс.Метрика