кыргыз тилиндеги гезит "Алиби"


Ташиев Бакиевди алып келет…
Түштүктө "Ташиев Бакиевди алып келет" деген кабар уу-дуу болууда. Аксакал адамдардын айтканына караганда, февралдын аяк ченинде бир балээни баштаганы жатыптыр. Неси болсо да дөң саясатчылардын айынан ортодо карапайым эл жабыркабаса эле болгону. Ал эми Бакиевдерге баары бир эмеспи. Көз карашынан көптү билдирген Ташиев Бакиевдерге мынча неге ичи ачышып жатканы белгисиз. Же акча дегенде атасын өлтүргөн заман болуп калганбы. Бакиевди алып келди дегиче түндүк-түштүк кагылышып, граждандык согуш башталаарын Ташиев мырза ойлонду бекен. 87 кыргыздын башын жуткан Бакиевди алып келүүгө Ташиевдин моралдык укугу барбы өзү? Учурда Бакиев менен табакташ болгондор түштүк элин пайдаланып, төңкөрүш жасаганы жатканы айкын болууда. Айрым маалыматтар боюнча Азимбек Бекназаров да кол кабыш кылганы жатыптыр. Балээни баштаардан мурда биринчи өзбек-кыргызды кагыштырып, анан ойлогон максаттарына жетишет имиш. Неси болсо да карапайым калк көркоолорго азгырылбай, тынчтыкты сактап, акылдарына келсе эле болду.


Көмүрдүн тоннасынан 3 миң сом кимдин чөнтөгүнө түшүүдө?
Кыш кылычын кынына салган кез келгени менен кыргыздын кышы жазында болот эмеспи. Бакиев кетсе эле тезек термейден арылабыз го десек, ал күндөгүдөй электр жарыгы өчпөгөнү менен көмүрдүн баасы асман чапчып, анча-мынчабыздын сатып алганга алыбыз деле келген жок. Себеби, 1 тонна көмүр аталган шахталарда 3 миң сомдон 4 миң сомго чейин сатылууда. Бирок, анын жетекчилиги өкмөткө берген көрсөтмөлөрүндө 600 сомдон 800 сомго чейин сатып жатышкандыктарын белгилешип отчёт беришкен. Мына ушундай окурман. Ал акчалар кимдин чөнтөгүн кампайтып жатканын, Бишкек-ТЭЦ эмнеге Казакстандын "Шабыркуль" шахтасы менен келишим түзөөрүн, көмүр кендериндеги ыраатсыздыктар бир канча жылдан кийин кимдерге азап алып келээрин, алардын артында кайсыл адамдар тураарын кийинки сандарыбыздан кененирээк окуйсуздар.


Бюджет тартыштыгы 21 миллиард. Өкмөт: "буйруса толот"
Кыргыз өкмөтү бюджетти бекитип Жогорку Кеңештин каржы боюнча комитетине жөнөтүптүр. Маалыматтар боюнча бюджеттин тартыштыгы 21 миллиард сомду түзгөн. Ал суммадагы акчаны кайдан табат? Бул азыркы өкмөттөгүлөрдүн көкөйүнө көк таштай тийип жатыптыр. Ал эми ЖКнын каржы фракция башчысынын орун басары "атамекенчи" Өмүрбек Абдрахманов болсо тиешелүү жетекчилерге кайрылып "мындай акчаны кайдан табасыңар" десе, кебелбеген биздин өкмөт "буйруса толтурабыз, кам санабагыла" дептир оозеки. Кыргыздын "буйруса" дегени бүтпөйт эмеспи. Минтип айтып жатышканына караганда Атамбаев алып келип жаткан акчаларды деле айтып жаткан жок. Кыргызстан кендерге бай эмеспи. Жакында кендердин чоңу З.Эсенаманов Таласка барып эл менен жолукканда "Андаш" кенин ачпайбыз деп, борборго келип "Кендерди эмнеге ачпайт экенбиз, аларсыз биз оокат кыла албайбыз" деп басылмалардын бирине маалымат бериптир. Таластыктар түрүлүп түп көтөрүлө Бишкекке келгени да ошол себептен экен. Демек, өкмөттүн "буйруса толот" дегени ушул кендерди ачуудан башка аргасы калбай, аларды кандай да болсо иштетүү керектигин ойлонуп жатса керек дегенден башка айтаарыбыз жок. Ошентип өзүңөрдү да, элди да кыйнай бербей кетип жаткан негизсиз чыгымдарды туура жолго салып койбойсуңарбы. Маселен, эски чиновниктердин пенсиясын эле алып көргүлөчү, канча акча самандай сапырылып жатат. Усубалиев аксакал 800миң, Баекова 500 миңге жакын, Садыбакасова да андан кем эмес акчаларды пенсияга гана кемирип жатканын эмнеге талдабайсыңар. Акчаңар көп да.


"АС-пресс"






Яндекс.Метрика