mainkaptal

Пользовательский поиск
Кыргызстан социал-демократтары:
"Бөлүнгөндү бөрү жейт!!!"
24-августта Кыргыз улуттук филармониясында өткөн Кыргызстан Социал-демократиялык партиясынын юбилейлик Х съездине, өлкөнүн ар кайсы аймактарынан 767 делегат катышты. Иш-чара өлкөнү сактап калуу, аны ичинен бөлүп-жарууга жол бербөө урааны астында өттү.

Партиянын жолбашчысы Алмазбек Атамбаев апрель революциясы үй-бүлөлүк, хандык башкарууга негизделген системаны кыйратып, Кыргызстандыктар көптөн зарлап күткөн жеңишке жетишкендигин белгиледи. Бирок, июндагы Түштүк каргашасы бул тарыхый жеңишке көлөкөсүн түшүргөнүн кошумчалады. Атамбаевдин ою боюнча, Кыргызстанды бөлүп-жаруу, акыры аны кыйратып жок кылуу үчүн бир катар күчтөр тымызын иштерди жүргүзүп жаткандай. Бирок "көк-жал, кылымдар бою азап-тозокторду жеңип келген Манастын тукумдары мамлекеттүүлүгүн сактап калат" деп санаалаштарына кайрат берди.
СДПК съездинде тышкы донорлордун көзүн карап отура берүү "Кыргызстандын келечегине кедергисин тийгизет" деген ойлор айтылды. "Өлкөбүз дайым эле суранып-тиленип жүрө береби? Мисалы, экономикабыздын бардык ресурстары буга чейин бир үй-бүлөнүн жана бир ууч топтун чөнтөгүнө гана иштетилип келген. Мындан ары экономиканын бардык ресурстары бир үй-бүлөгө эмес, өлкөнүн гүлдөп өнүгүшү, элдин жыргалчылыгына бурулат", - деди Атамбаев.
Коопсуздук маселеси аталган жыйында негизгилерден болду. Анткени, азыр ар бир Кыргызстандыкты жеке жана жакындарынын коопсуздугу катуу кабатырлантууда. Колтугубузда террорчулук оту тутанып, баңгизат кылмышкерлери ээ бербей жатканда, коом ичинде болсо бандиттер өз билгенин жасап турганда армия менен милицияга өзгөчө көңүл буруу, талап кылынат. Шайлоону таза, адилет өткөрөлү, атаандаштарды ыплас жолдор менен каралабайлы, шайлоонун арты эл ичиндеги чыр-чатактарды апкелбесин деген ойлор басымдуулук кылды.
Мисалы, Баткен облусунан делегат Карамат Орозова партиялаштарын жана саясый атаандаштарын "бийлик үчүн эмес, өлкөнүн келечеги, биримдиги үчүн" күрөшүүгө чакырды.
Жарыш сөзгө чыккан Исмаил Исаков өзү жетектеген "Азаттык" партиясы СДПК менен бир тизмеде шайлоого барууну чечкендигин билдирди. Анын оюнча, биримдик, өлкөнүн бүтүндүгү жана акыйкаттык үчүн күчтү топтоо азыр катуу зарыл болуп турган экен.
Съездде КСДПга санаалаш да, атаандаш да партиялардын өкүлдөрү сүйлөштү. "Ата-Мекен" партиясынын төрагасы Өмүрбек Текебаев социалисттик солчул кыймыл азыр дүйнө жүзүндө да, Кыргызстанда да улам көбүрөөк колдоого ээ болуп жатканын айтты. Ал Кыргыз мамлекетин өнүктүрүү программасын биргеликте иштеп чыгууга чакырды. "Ата-Журт" партиясынын лидерлеринин бири Акматбек Келдибеков да "азыркы кырдаалда мамлекеттин бүтүндүгүн сактоо эң көйгөйлүү болуп калды" деген ойду жактады.
Жыйында КСДПнын Жогорку Кеңешке 120 кишиден турган тизмеси бекитилди. Андан жыйырма беш орун жаштарга бөлүндү. Ошондой эле Кыргызстанды мекендеген ар түрдүү улуттардын өкүлдөрү да татыктуу орундарга ээ болушту.
Перизат КАДЕНОВА




кыргыз тилиндеги гезит "Айат пресс"
Яндекс.Метрика