Агым
Чек ара чатагынан улам Тажикстанда кымбатчылык башталды

Кечээ Тажикстандын Бажы кызматынын биринчи орунбасары Нематжан Рахманов Душанбеде берген маалымат жыйынында жакын арада Кыргызстан менен Тажикстандын чек арасы ачыларынан үмүттөнөрүн билдирди. Кыргыз-тажик беш чек ара посту 11-январдагы чек арачылардын атышуусунан кийин Кыргызстан тарабынан жабылган. Азырынча качан ачылары белгисиз.
Чек аранын толук жабылышы буга чейин соода-сатык алакалары тыгыз болгон чек аралаш райондордун элинин турмушун татаалдантты. Айрыкча Тажикстандын чек арага жакын аймактарында азык-түлүк кымбатчылыгы байкалган. Ал эми Кыргызстан тарапта Тажикстанга кире турган автоунаалардын катары күндөн күнгө калыңдап жатат. Тажикстандын Бажы кызматынын биринчи орунбасары Нематжан Рахмановдун айтканына караганда, Кыргызстан менен болгон чек ара чырынан улам жабылган өткөөлдөр аталган өлкөнүн бажы төлөмүнүн топтолушуна да терс таасирин тийгизип жатат.