mainkaptal

Пользовательский поиск
Айлампа
Айсалкын САМСАЛИЕВА:
"Саматтын кайгысына кайдыгер карабайлы"
2009-жылдын 30-сентябрь күнү Сокулук районунун Жал айылында жашаган Самат Асылбек уулу трансформатордон ток уруп эки колунан айрылган. Башкалардын шалаакылыгынын айынан эки колунан эле эмес жүрөгүнө, бөйрөгүнө да чоң зыян алган Самат азыр жардамга муктаж. Саматтын абалын жакындан билген ырчылар кайрымдуулук концертин өткөрүп, түшкөн каражатка протез кол салдырып берүүнү максат кылышууда.


- Айсалкын, Саматка жардам берүү демилгесин ким көтөрүп чыкты?
- Мен Самат тууралуу кесиптештеримен угуп жүргөнүм болбосо өзүн билчү деле эмесмин. Үй-бүлөлүк абалы ансыз деле оор болуп турганда аз да болсо жардамыбызды берели деп башкалардын башын бириктирип жатабыз. Самат беш бир тууган, атасы курулушта иштеп жүрүп оор жаракат алып каза болгон. Азыр беш баланы жалгыз бой энеси багып жатат. Учурда Саматтын оорусу менен күнүгө бейтапканадан башы чыкпай чуркап жүрөт. Башында биринчилерден болуп балерина Асел Айдарова жардамга келди. Кесиптешибиз Аида Байбосунова былтыр ЮАРда өткөн футбол чемпионатына барып "Манчестер Юнайтед" командасынын футболисттерине Саматтын сүрөттөрүн, видеосун көргөзүптүр. Алардан аз да болсо жардам ала алдык. Көп түкүрсө көл болот деген чын экен. Буюрса сентябрь айы аяктап баратканда Малдыбаев атындагы опера жана балет театрында "Мага баары бир эмес" деген концерт өтөт. Түшкөн каражаттын баарын Саматка жумшайбыз.
- Окуусунан үзгүлтүккө учураган бала азыр кайда?
- Оорусуна байланыштуу Самат эки жылдан бери мектепке барбайт. Мугалимдер үйүнө келип сабак өтүп турушат экен. Башына түшкөн кайгыга сынып калбай аракет кылып жатат. Англис тилин үйрөнсөм деген аракети бар экен. Андан сырткары, буту менен жакшы сүрөт тартат. Быйыл балдарды коргоо күнүнө карата уюштурулган сынакта сүрөт тартып биринчи орунга коюлган телевизорду утуп алган болчу.
- Каражат жагынан аттуу-баштуу саясатчылар каралашып жатабы?
- Канчасынан жардам сурадык, бири дагы үн каткан жок. Андан көрө карапайым элден жакшы жардам чыкчудай. Үч манжалуу протездер 15 миң доллар турса, беш манжалуусу 65 миң доллар экен. Мындай операция Кытайда, Москвада, Астанада гана жасалат. Саматтын үй-бүлөсү операция жасатууга эмес жол киресин таап барганга да мүмкүнчүлүгү жок. Биз бардык сумманы чогулта албасак да, аз болсо да салымыбызды кошуп каралашсак деген эле үмүт.
- Концертке кимдер катышат?
- Концертке катышып бериңиз деген суранычыбызды көбү четке каккан жок. Тынай Алыбаев, Каныкей, балерина Асел Айдарова, опера ырчысы Кундуз Карыкбаева, кыл кыякчы Нурайым Азыкбаева, Иса, фольклордук-этнографиялык "Ордо-Сахна" тобу дагы көптөгөн ырчылар катышат. Концертте Самат жөнүндө даярдаган видеороликти көргөзөбүз. Концерт жакшы деңгээлде өтөрүнө ишеним чоң. Негизгиси жардамга муктаж болуп турган балага жардам берсек максатыбыз ишке ашкан болор эле.





Тып… тып… тып…
Жыл сайын туулган күнүнө арнап концерт коюп келген КР эмгек сиңирген артисти Сыймык Бейшекеев ушу жума күнү Т.Сатылганов атындагы улуттук филармонияга өз күйөрмандарын чакырат.
***
КР эл артисти Роза Аманованын былтыр берген концертинде көбүнө билет жетпей суусаган бойдон калышты эле. Бул жолу ырчынын концертине күбө болуп, чер жазууга толук мүмкүнчүлүк бар. Комуздун коштоосунда аткарылчу дастандар, эстрада жанрындагы жаңы чыгармалар жума аягында филармонияда жаңырат.
***
Ушул эле концерттик залда кийинки жумада кыргыз радиосунун 80 жылдыгына арналган чоң концерт өтөт.
***
Сентябрдын жыйырма үчүндө улуттук филармониянын 75 жылдыгына арналган чоң салтанат болмокчу.






Табылды Актанов эми жазуучу болот
Кыргыз эл артисти, Муратбек Рыскулов атындагы эл аралык сыйлыктын лауреаты Табылды Актанов колуна калем кармап роман жазганы турат. "Сынган бугу" күүсүнүн тарыхын көлөмдүү роман кылып кагаз бетине түшүрсөм деген ниети бар. Театрдын иши менен эле алек болбостон убактысын китепке да бөлөрүн, буюрса жаз-жай айларында элдин сынына коерун билдирди.


Аскат жердештеринин черин жазат
Жакында эле Сардарбек Жумалиевдин "Үзүлбөгөн үмүттөр" деген чыгармасын жаңыртып жазган ырчы Аскат Мусабеков Бакыт Мукулдун үй-бүлөлүк ансамбли менен сентябрь айында Нарынга гастролго аттанат. Андан ары Ат-Башы, Кочкор, Жумгал райондоруна чейин барып, Казарманды да ашышы мүмкүн. Гастролдон келгенден кийин жубайы менен биргеликте жаңы альбом чыгарууну пландаштырууда.


Чубак Сатаевдин ырларын созобуз
Келерки шейшембиде Спорт ордосу Чубак Сатаевдин күйөрмандары үчүн эшигин кең ачат. "Чубак Сатаев кечээ жана бүгүн" аталыштагы чоң концертте улуу муундан жаш ырчыларга чейин катышып, авторго тиешелүү чыгармалар аткарылат. Казакстандын белгилүү топтору "Музарт" жана "Арно" да Чубак Сатаевдин чыгармаларын аткарып жүрүшкөндүктөн атайын мейман катары чакырылды. Концерттен түшкөн каражат атайын таланттын урматына түзүлгөн фондго жумшалат. Уулу Кубаныч Сатаевдин айтуусунда, атасы тууралуу китеп чыгарганы да турушат.


Ильяздын күйөрмандарына күмүш сырга
Ильяз Абдыразаков продюсери Баяке менен кайрадан табышып, азыр жаңы альбомдун үстүндө иштеп жатат. Жыйырмадан ашык жаңы ырларды камтыган альбомдун бетачары жеке концертинде болот. Жыл сайын күз айында концерт берип келген ырчы бул жылы да салтты бузган жок. Сентябрь айынын жыйырма үчүндө жалаң жаңы ырлардан турган жеке концертин коймокчу. Жеке жашоосундагы негизги жаңылык - ушул айда кайнене-кайнатасынын эшик-төрүн көрүп, келинчегине ата-энесинин үйүнө жол ачып берет.


Бетти даярдаган
Анара ДҮЙШӨНАЛИЕВА






кыргыз тилиндеги гезит "Агым"

Яндекс.Метрика