mainkaptal
Пользовательский поиск
  ӨНӨРМАН

Мирлан Мурзаев:
"Кыргызстанда деле футбол менен жан бакса болот"

Кыргызстандын мыкты чабуулчусу катары жаш балдардын кумирине айланган Мирлан Мурзаев чынында эле таланттуу жигит. Ойноо стили Криштиану Роналдого окшогон чабуулчубуз топ менен келгенде коргонуудагы атаандаштары анын кыймылдарына алданып, көп учурда кулаган бойдон калып калышат. Жакында Европага кетсемби деп турган талантыбызды башка өлкөгө тарттырып ийип алданып калбасак эле болду деген ойдо өнөр ээсинин оюн билдик.


- Мирлан футболист болуп төрөлгөн дешет го…
- Спорттун бул түрүнө башында көп деле кызыкчу эмесмин. Кайсы жердин кулунусуң деп сурашканда, Сүлүктү шаарынан болом десем, ошол жактан да футболисттер чыгабы деп таң калышат. Себеби, Лейлек жергесинде спорттун бул түрү анча өнүккөн эмес. Биздин аймактан көбүнчө күрөш менен машыккан балбандар чыгат. Мен деле Пеле сүйгөн спортко кызыкпаганымда, мушкер же балбан болуп кетмекмин. Азыр деле кичине шыгым бар. Анткени классташ досторумдун көбү күрөшкө берилип кетишкен. Алар менен тамашалашып кармаша кеткенде жемимди жедирбегенге аракет кылам. Бокска бир ай, күрөшкө 2-3 ай катышканда алган тажрыйбам мага жетиштүү болсо керек. Ал эми физикалык жактан футбол ойноп жүрүп эле чыңалдым окшойт. Мен кичине кезимде эле ата-энем Кара-Балтага көчүп келишип, чогуу жүргөн досторум менен футболго барып калгам. Ошол себептен чыныгы лейлектик болбой калгам.
- Ар бир футболчунун өзүнө жаккан гол согуу ыкмасы бар тура?
- Негизи менин чабуулчу болгонумдун себеби да ушул гол согуу деп койсом болот. Анткени, коргоочулар жолотпой, дарбазачы кайтарып турса барып гол киргизүү өзүнчө бир ырахат тартуулоочу кызык нерсе да. Менин футболдогу принцибим "чабуул - коргонуунун мыкты ыкмасы". Анткени дайыма сен чабуул койсоң, атаандашыңдын коргонуудан колу бошобой калат. Андыктан, "Дордойдун" көп гол жаратканы да ушундан. Суроодон алыстап баратам, мага кандай гол киргизген жагат дедиңиз окшойт. Чынында эле ар бир футболчунун өзүнүн гол согуу ыкмасы бар. Ал адам өзү каалагандай гол жаратса, ошондон кадимкидей ырахат алат. Мисалы, дүйнө жылдыздарынан Патрик Клюйверт баш менен дайыма гол соксо, чехиялык футболчу Павел Недвед алыстан сокку узатып ийгилик жаратчу. Дэвид Бекхэм болсо айып абалынан гол жаратаарын баарыбыз жакшы билебиз. Ал эми мен 4-5 кишини алдап өтүп, оң бут, сол бутту тандабай туруп күтүүсүз жерден киргизген голду жактырам. Футболисттердин кимиси болбосун "через себя" деп коюшат, чалкалап артка кулап баратып тээп киргизген голду жакшы көрүшөт. Муну күйөрмандар да аябай жактырышат. Баш менен мен кичине алсызыраакмын, анда-санда майрамдарда эле киргизип калбасам, аз киргизем.
- Гол жаратканда кубануу салты бар эмеспи. Сен эмне үчүн дайыма унутпай сальто секиресиң?
- Мындай өнөрдү досум үйрөткөн. Ал акысы үчүн анын урматына дайыма гол соккондо сальто секирип турам деп сөз бергем. Ошондуктан унутуп калбасам экен деп дайыма эстеп турам.
- "Дордойго" кантип келип калдың?
- Өспүрүмдөр курама командасы менен машыгып жүргөндө мени 2005-жылы "Мурас-Спорт" деген "Дордойдун" экинчи клубуна чакырышты. 2006-жылы "Дордой" келишим түзүп, жакшы шарттар менен жогорку лигада ойной баштадым.
- Айлык маянаңар кандай?
- Мен азыр акча албай эле ойноп жатам. Себеби, жыл бүтөрү менен Европага же башка күчтүү лигалардын бирине кетсемби деген ойлор бар. Ал эми ким канча айлык аларын өзүбүз да билбейбиз. Ар бир оюнчунун өзүнүн карточкасы бар, ошол эсепке акча которулуп турат. Футболисттер кааласа банкоматтан керектүү суммасын алып алышат.
- Африкадан келип "кара кыргыз" атка конушкан футболчулар менен кандай сүйлөшөсүңөр?
- Жакшы сүйлөшөбүз. Дэвид Тетте Кыргызстандын жараны болуп алды. Даниэль Тэгонун сүйлөшкөн кызы кыргыз. Алар менен биз орусча, англисче сүйлөшөбүз. Бирок, "жаным" деген сыяктуу сөздөрдү, сөгүнгөндү үйрөтүп, тамашалашып турабыз.
- Даниэль Тэгону принц дешет го…
- Ооба, анын атасы король экен. Ошондуктан королдун балдарынын бетин тилип коюшат тура.
- Москванын "Локомотивине" кантип барып калдың?
- Ал жакта жылда кароо сынагы өткөрүлөт. Ошол сынакка барып өтүп кеттим. Дароо келишим түзүп, экинчи курамына ойноп калдым.
- Негизги курамына ойнодуңбу?
- Достук беттеште Драман Траоре менен биргеликте чабуулда болдук. Бирок беттеш 0:0 эсебинде аяктаган. Дмитрий Сычев сыяктуу жылдыздар менен жанаша жүргөнүң менен көп ойнобосоң кыйнала берет экенсиң. Багылган атты деле чаппай койсоң бук болуп кетет го, ошол сыңары мен беттештерге аз чыкканым үчүн 8 айдан соң кайра келе бердим. Анүстүнө "Локомотивдин" жетекчилигине Кыргызстандан бирөө жамандап кат жазыптыр. Ким бут тоскусу келгенин дагы деле түшүнө албай жүрөм.
- Ал жактан бир нерсе үйрөнө алдыңбы?
- Кыргызстанга кайра келгенде өсүш болгону өзүмө да, башкаларга да билиниптир. Физикалык жактан өзгөчө жылыш болуптур.
- Өзүңдөн башка кыргыздын 5 мыкты футболчусун санап көрсөң, адис катары…
- Эмил Кенжесариев, Антон Землянюхин, Чолпонбек Эсенгул уулу, Руслан Сыдыков, Азамат Байматов.
- Кайсы клубдун күйөрманысың, футбол жылдыздарынан кимдер жагат?
- "Челси" мен үчүн мыкты клуб. Ал жакта ойноо - кыялым. Оюнчулардан Леонель Месси, Дидье Дрогба жана Криштиану Роналдолордон үлгү алам.
- Үй-бүлөң жөнүндө кеп кылбадың го…
- Атамдын чакан иши бар. Апам үйдө эле отурат. Эжекем турмушка чыгып кеткен. Агам да футболист.
- Демек, Кыргызстанда деле футбол ойноп жан бакса болот турбайбы?
- Болот. Эки баласынын футболдон алган айлыгы апама жетиштүү экен. Мыкты ойноп чет өлкөгө кетсең, Кыргызстан үчүн бай болуп жашасаң болот. Андыктан футболист болом деген таланттуу жаш балдарга ата-энелери шарт түзүп беришсе. Бизде футболдон ким жыргап кетиптир деп эле көп таланттардын отуна суу сээп салышат. Кыскасы, Кыргызстанда деле футбол менен жан бакса болот.
- Качан апаңды жыргатып келин жумшатайын деп турасың?
- Агам үйлөнө элек. Азырынча шашылбайм. Бирок жөнөкөй кыздар менен дос болууга каршы эмесмин.
Кудрет ТАЙЧАБАРОВ



кыргыз тилиндеги гезит "Агым"

Яндекс.Метрика