21-сентябрда "АМАНАТ" ТАПШЫРГАНДАР: Урматтуу биздин күйөрмандар, туугандар! Айылдагы ага-туугандын, шаардагы тааныштардын, куда-сөөк, дос-жарлардын жакшылыгына каалоо-тилектериңизди, аманат сөзүңүздү биз аркылуу билдирем десеңиз, "Жаңы Агым" гезитинин 38-67-06 телефону шейшемби күнү 10.00дон 12ге чейин сиздин кызматта. Тилинде калемпир-мурчу барлар да өнөрүңүздөрдү көрсөтсөңүздөр болот.
П-134. Артынып жол карытпай, ат арытпай, убагында "Алга, Кыргызстан" партиясына мүчө болгон эргулдар эч ойлонбой туруп оптом "Ак жолго" кирип, кош колдоп Бакиевдин камчысын чаап турушту эле. Бет жокко эт жок дегендей, эт жебесек да шорпо ичип туралы деп эсине эми келгенсип, "Ата журт" партиясын апыл-тапыл уюштура коюшуп, үрккөн койдой болуп тобун жазбай, эми бул партияга кире качышты. Булар кокус депутат болуп калса эл үчүн иштеп берерине дегеле көзүбүз жетпейт. Себеби булардан эл эбак эле түңүлүп бүткөн. Карышкырды канча баксаң да токойду карайт дегендей, булар элдин эмгегин талап-тоноп жегенге көнгөн эргулдар да. Эрмек, Сапар, Капар. П-135. Бекназаровдун "шайлоо убагында акчалуулардын берген акчасын алып чөнтөгүңөргө салгыла да, анан өзүңөр каалаган партияга добуш бергиле" дегени коррупцияга каршы күрөшкөн кишинин сөзү эмей эле, кайра коррупцияны күчөтүп, элди тескери жолго салгандай болуп атат. Бул Бекназаровдун адамгерчиликке жатпаган, убагында Акаевдин айтканын кайталаган жарыясы болуп калды. Ушундай балээлердин баарын Акаев баштап кетпеди беле. Эми кайра ошол жолго түшөлүбү? Мындан улам Бекназаров миллиондорду чогултуп койду деп элдин айтканы чындыкка коошуп турат. Акылбек. П-136. Нариман Түлеев, мэрлик орун атаңдан калса да талашканыңды токтотчу. Энең сени мэр кылып төрөсө да эмне болуптур. Сени ал кызматта иштей албайт деп алган жок, жеп-ичкендерди колдоп, аларга кызмат кылганың үчүн алды. Эркектик, адамдык сапатыңды сактап, оң жолго түшчү деги. Саламат. П-137. "Ата журт", "Бүтүн Кыргызстан" партияларына жамынып депутаттыкка аттанган эргулдар өткөн мезгилде өкмөткө кошомат кылып кол чаап, Каркыраны казактарга сатып, электр жарыгын кымбаттатып ж.б. элге каршы иштерди иштегендер ошол күнөөлөрүн жууш үчүн азыр шайлоого жумшаган миллиондогон акчаларын апрелде шейит кеткендерге, оор жаракат алгандарга, Ош, Жалал-Абад коогалаңында үй-жайсыз калгандарга жардам берип, анан эмки шайлоого аттанышса болбойт беле. Ошондо булардын анча-мынча күнөөсү азаят эле. Жабыр тарткандар. П-138. Союз кезди эңсегендер жок десем, / Жалган болор жазбайт элем сезбесем. / Уксус ичип уулангандай боломун, / Эсил кайран СССРди эстесем. / Ал заманда особняк салбаган, / Үчтөн-төрттөн токолдорду албаган, / Жетекчилер элдин камын ойлошуп, / Ымыркайлар таштандыда калбаган. / Эмки чоңдор калп айтканга маш болуп, / Элдин жүгүн аркалаган аз болуп, / Кайрымы жок олигархтар көбөйдү, / Элден жыйган байлыгына мас болуп, / Баарын чечкен акча болуп баратат, / Акыйкат жок жүрөктөрү таш болуп. Батмакан Алымбекова, Бишкек шаары. П-139. Туу туткан генийлигин сансыз берен, / Жарашып мурда турган орду белен. / Кыргызды тукум куруттан сактап калган, / Авторун нур замандын койсок белем. Эркин Жаныбеков. П-140. "Кыргыз туусунда" келечегине балта чапкан "Мас маданият каттоодо" аттуу макалада кыргыздын урматтуу адамдары Жоомарт Кадыралиев, Жылдыз Малдыбаева, Жумабек Тентиев, Кадырбек Байбосунов, Асан Айтикеев эң маанилүү маселе көтөрүшкөн. Ушул боюнча республикалык үч күндүк семинар өткөрүп, башкы докладчы катары Роза Исаковнаны дайындаса маселе чечилбесе да ордунан жылар эле. Семинардын чыгымын эгер президент тапшырса, "максымдын" жетекчиси Табылды Эгембердиев деле көтөрөт эле. Токжума. П-141. Аз айлыкта жүргөн эрки бектерге, / Колдогула оокатына жеткенче. / Парламентте жүргөндөрдүн пулунан, / Мугалимдер менен берсек меддерге. Эркин Жаныбеков.
Даярдаган
Гүлжан ИЛИЯЗОВА
Сайт жөнүндө: ► Бул айылда негизинен кыргыз гезиттери электрондук тиркеме түрүндө жарыяланат. ►Архивге, емейлге жана редакцияга шилтемелер
ошол гезиттин башбарагында берилген. ► Жеке макала жарыялоого буйрутмалар кабыл алынат.
Сведения о сайте: ► На сайте публикуются в основном кыргызскоязычные газеты
в виде электронных подшивок данных газет. ► Ссылки на архивы, емейл и данные о редакции указаны на главной странице конкретной газеты. ►Принимаются заказы на публикацию частных статей.
