Рух жаракасы бүтөлөбү?

Узаган жылда ЮНЕСКОнун "Манас" эпосун Кытай Эл Республикасынын атынан дүйнөлүк рухий баалуулуктарынын шедеври катары тааныганына ичи күйбөгөн кыргыз калган жок. Мындай "сүйрүпризге" коомчулукта биртоп эле коңгуроо кагылды. Бирок, улуттун руханий уңгусуна доо кетип жатканын сезбедиби, же саясаттан колу бошобой жатабы, бийлик буга көңүл бурбады.

Кытайлар "энчилеп" алган дастаныбызды көпчүлүк дале кызуу талкуулоодо. Кечээ борбордо "Манасты коргоо" комитетинин жыйыны болуп, ага катышкандар президентке эпосту Кыргызстандын атынан кайра каттатууга аракет көрүүсүн сурап, кайрылуу жолдошту. Кайрылууда "Манасты" калкка, дүйнөгө таанытууну күчөтүү, Кыргыз таануу улуттук борборун түзүү, манасчылар мектебин ачуу, жаңырган жылды "Манас" жылы деп атоо, "Ала-Тоо" аянтын "Манас аянтына" алмаштыруу сыяктуу демилгелер камтылган. Кайрылууга 60тан ашуун жазуучу, саясатчы, коомдук ишмерлер кол койгон.
("Манас" эпосунун айынан ЖК төрага орунбасары Чолпон Баекова эл өкүлү Ибрагим Жунусовдон кантип кагуу жегенин 2-беттен окуңуздар)

---