Кыргыз гезиттер архиви

  Көңүл чордонунда

Жаңы жыл жакшылык жышааны
Кыргызстандын уучу куру эмес. Карапайым эл жылына мамлекет тарабынан, өлкөдө иш алпарган бардык ири уюмдардан жана ишканалардан түрдүү жардамдарды, майрам сайын белектерди алып сүйүнүшөт. "Кумтөр Оперейтинг Компани" жардамын да, куттуктоолорун, белектерин да аябайт. Жаңы жылга карата Жети-Өгүз районундагы башталгыч класстын окуучулары жана бала бакчадагы наристелер таттуу белектерди алышты.
Жылына уюштурулуучу иш-чара быйыл да жагымдуу маанайда өттү. 23-декабрда Барскоон мектебинин 584, Тамгада 266, Тосордо 178, Кичи-Жаргылчакта 322 жана Чоң-Жаргылчакта 102 1-4-класстардагы окуучулары кен казуучу компаниядан белек алып сүйүнүчкө бөлөнүштү. Ширин белектер ар бир окуучунун колуна тапшырылат, ал эми эрте болгонунун себеби, окуучулар 25-декабрдан тартып кышкы эс алууга тарашат. Эс алууңар таттуу жана көңүлдүү болсун, бөбөктөр!


Барскоон мектебинин 4-класстагы окуучусу Чыңгыз:
- Мен жаңы жылды жакшы көрөм, самап күтөм. Анткени бул майрамда биздин үйдө баары көңүлдүү өтөт. Мектепте болсо балаты майрамын кооз костюмдарды кийип, Аяз ата, Аяз кыз менен өткөрөбүз. Бизде дагы бир Аяз ата бар - ал Кумтөр. Быйыл үчүнчү жолу ушундай белек тапшырышты. Өткөн жылы Кумтөр компаниясы биздин мектепке спорт зал жасап берген. Азыр ал жакта машыгып турабыз. Биз, балдар-кыздар бул Аяз атага ыракмат айтабыз.
Барскоон айылы аймактагы эң чоң айыл. Болгону бир мектепке айылдын алыскы тарабынан келген балдар кышкысын кыйналышат. Учурда дагы бир мектеп курула баштады. Айтмакчы, ал да Ысык-Көл облусунун өнүктүрүү фондуна алтын өндүрүүчү компаниянын каражатына ишке ашырылып жатат. Бирок баарынан алыс мектеп бийик тоолуу айыл Ак-Шыйракта. Ал жердеги мектеп-интернатта болгону 42 окуучу бар. Алар да белексиз калган жок. Чакан айылдын эли мал чарбасы менен алектенет. Айыл Кумтөрдүн жанында болгондуктан, Кумтөрдүн электр түйүнүнө кошулуп, энергиянын бул булагы алар үчүн акысыз. Билсеңер, ал жерде ажайып кооз жайыттар, төрт түлүк малга ылайык жерлер бар.
Компания канатына алган дагы эки бала бакча бар. Тамгада 70 наристе жана Барскоондо 73 бөбөк тарбияланат. Алар Аяз ата менен 28-декабрда жолугушат. Бакчадагы жагдай башкача, балдардын жаңы жылдык балатысына барып, алардын даярдаган концертине күбө болуп, майрамдык костюмдарын, ырларын, бийлерин көргөндө жүрөк эргийт. Барскоон бала бакчасынын жетекчилигинин менеджменти аркылуу жардам көбүрөөк тийет. Алар демилге көтөрүп, кат аркылуу кайрылышып, аракеттенишет.
Компаниянын региондор менен байланыш менеджери Керим Шатманов:
- Бир жолу барсак эки кабат керебеттин ар бир кабатында экиден бала уктап жатыптыр. Буга көңүл кош боло алган жокпуз. Караколдогу усталарга тапшырма берип, кичинекей балдарга ылайык үстөл, отургучтарын да кошо жасатып, тартуу кылдык. Тамгадагы бала бакчанын суу маселесин чечип бердик.
- Мындан эки жыл мурда Барскоондогу оорукананы оңдоону баштаганыңар эсте. Иштер кандай жүрүп жатат?
- Жаңы жылга биз Барскоондогу оорукананын ремонтун бүтүрүп берели деп аракеттенип, бираз иштер аягына чыкпай калды. Эки жылдан бери оңдолуусу күтүлгөн оорукананы дагы эки ай күтө туруп, бирок толугу менен жасап бүтүүнү туура көрдүк. Мындан эки жыл мурда оорукананы оңдоо боюнча иш баштаганбыз. Анда ал жайдын жетекчилиги ишти өзү көзөмөлгө алып, 1 млн. 800 миң сом бюджет менен башталган. Долбоор боюнча биринчи бөлүнгөн 900 миң сом башка жактарга сарпталып баратканында иш териштирүүгө токтоп калган. Биз соттук териштирүүлөр бүткүчө күтпөй, быйыл кайта ишке кириштик. Бул жолу биз бардыгын өзүбүз көзөмөлгө алдык. Компания түздөн түз барскоондук куруучулар менен келишим түздүк, анткени алар өзү жашаган жерде аткарган жумушуна толук жоопкерчилик менен мамиле кылышат. Канча каражат сарпталаарын биз көз карандысыз баалоочуларды чакыртып санаттырганбыз. 1-ноябрда 3 млн. сом бюджети менен ремонт башталып, учурда 80 пайызы даяр.
Оорукананын башкы дарыгеринин милдетин аткаруучу Кубанычбек Гүлбашев:
- Буюрса, жаңы жылда барскоондуктар жаңыртылган жайга келип, дартка дабаа таба алышат. Биз имаратты оңдоодон сырткары, дарт аныктоочу жабдык да убада кылганбыз, буюрса, орундалат. Мен Саламаттык сактоо министрлигине кайрылуу жолдоп, эскилиги жеткен жабдууларды биротоло жаңыртууга салымын кошуусун сурайм. Министрликте жаңы болбосо да, колдонулган, бирок жакшы абалдагы жабдыктар бардыр. Анткени бир нече айылга тиешелүү төрөт бөлүмү да ушул ооруканада.
Учурдан пайдаланып, Кыргызстандагы эң ири өндүрүш компаниясынын аймакты өнүктүрүү боюнча келерки жылга пландары тууралуу Керим Шатмановго суроо узаттык.
- Биз келерки жылы аймакты өнүктүрүү боюнча жаңы деңгээлге чыгууну чечтик. Ал үчүн Кыргызстанда иш алпарган көптөгөн ири эл аралык уюмдар менен жолугушуп, бирге аракеттенүү багыттарын издеп жатабыз. Биз канатка алган Жети-Өгүз районунда да көптөгөн жакшы иш-чаралар өткөрүлөрүн билебиз. Эки тараптын көптөгөн жылдардан бери топтолгон тажрыйбасын, маалымат базаларын жана каражаттарын кошкондо жалгыздан иштегенден алда канча жакшы натыйжаларга жетише алабыз. Алгачкы сүйлөшүүлөрдөн аймак айыл чарбалык багытта экенин аныктап, биринчи фермердик чарбаларга жардам көрсөтүүнү белгиледик.
Кыргызстандын алтын кемерлүү тоолорунда кен казган компанияга, ал аймактын жашоочуларын жаңы жылда бардык тилектери орундалуусун каалайбыз. "Көч бара-бара түзөлөт" дегендей, калкыбыз туруктуу өнүгүү жолуна түшөрүнө үмүтүбүз чоң.

Даярдаган Нуржан АЛЫМКАНОВА